โหติ สุราเมรยมชฺชปมาทฏฺฐานา ปฏิวิรโต จ โหติ ฯ อิเมหิ โข ภิกฺขเว ปญฺจหิ ธมฺเมหิ สมนฺนาคโต มาตุคาโม วิสารโท อคารํ อชฺฌาวสตีติ ฯ นวมํ ฯ

[๔๙๖] ปญฺจหิ ภิกฺขเว วฑฺฒีหิ วฑฺฒมานา อริยสาวิกา อริยาย วฑฺฒิยา วฑฺฒติ สาราทายินี จ โหติ วราทายินี จ กายสฺส ฯ กตเมหิ ปญฺจหิ ฯ สทฺธาย วฑฺฒติ สีเลน วฑฺฒติ สุเตน วฑฺฒติ จาเคน วฑฺฒติ ปญฺญาย วฑฺฒติ ฯ อิเมหิ โข ภิกฺขเว ปญฺจหิ วฑฺฒีหิ วฑฺฒมานา อริยสาวิกา อริยาย วฑฺฒิยา วฑฺฒติ สาราทายินี จ โหติ วราทายินี จ กายสฺสาติ ฯ

สทฺธาย สีเลน จ ยา ปวฑฺฒติ ปญฺญาย จาเคน สุเตน จูภยํ

สา ตาทิสี สีลวตี อุปาสิกา อาทียติ สารมิเธว อตฺตโนติ ฯ ทสมํ ฯ>

มาตุคามสฺส พลวคฺโค ตติโย ฯ

ตสฺสุทฺทานํ

ปญฺจ วิสารทา ปสยฺหา อภิภุยฺย องฺเคน ปญฺจมํ

นาสยิตฺถ เหตุฏฺฐานํ วิสารทา วฑฺฒินา ทสาติ ฯ

มาตุคามสํยุตฺตํ นิฏฺฐิตํ ฯ

______________