อินฺทํว เทวา ติทสา สงฺคาเม อปราชิตํ

ปุรกฺขิตฺวา วิหริสฺสาม ๑ เตวิชฺชมฺหา อนาสวา ฯ

อิตฺถํ สุทํ ตึสมตฺตา เถรี ภิกฺขุนิโย ปฏาจาราย

สนฺติเก อญฺญํ พฺยากรึสุ ฯ

[๔๕๐] ๑๒ ทุคฺคตาหํ ปุเร อาสึ วิธวา จ อปุตฺติกา

วินา มิตฺเตหิ ญาตีหิ ภตฺตโจลสฺส นาธิคํ ฯ

ปตฺตํ ทณฺฑํ จ คณฺหิตฺวา ภิกฺขมานา กุลา กุลํ

สีตุเณฺหน จ ฑยฺหนฺตี สตฺต วสฺสานิ จาริหํ ฯ

ภิกฺขุนึ ปุน ทิสฺวาน อนฺนปานสฺส ลาภินึ

อุปสงฺกมฺม อโวจํ ปพฺพชึ อนคาริยํ ฯ

สา จ มํ อนุกมฺปาย ปพฺพาเชสิ ปฏาจารา

ตโต มํ โอวทิตฺวาน ปรมตฺเถ นิโยชยิ ฯ

ตสฺสาหํ วจนํ สุตฺวา อกาสึ อนุสาสนึ

อโมโฆ อยฺยาย โอวาโท เตวิชฺชมฺหิ อนาสวา ฯ

จนฺทา ฯ

ปญฺจกนิปาโต สมตฺโต ฯ

_________________

เถรีคาถาย ฉกฺกนิปาโต

[๔๕๑] ๑ ยสฺส มคฺคํ น ชานาสิ อาคตสฺส คตสฺส วา #๑ ยุ. วิหิสฺสาม ฯ