น คณฺหาติ น ปรามสติ นาภินิวิสตีติ อนุคฺคโห อุคฺคหณนฺติ มญฺเญ ฯ เตนาห ภควา

วิสชฺช คนฺถานิ มุนีธ โลเก

วิวาทชาเตสุ น วคฺคสารี

สนฺโต อสนฺเตสุ อุเปกฺขโก โส

อนุคฺคโห อุคฺคหณนฺติ มญฺเญติ ฯ

[๖๙๐] ปุพฺพาสเว หิตฺวา นเว อกุพฺพํ

น ฉนฺทคู โนปิ นิวิสฺสวาที

ส วิปฺปมุตฺโต ทิฏฺฐิคเตหิ ธีโร

น ลิมฺปตี โลเก อนตฺตครหี ฯ

[๖๙๑] ปุพฺพาสเว หิตฺวา นเว อกุพฺพนฺติ ปุพฺพาสวา วุจฺจนฺติ อตีตา รูปํ ๑ เวทนา สญฺญา สงฺขารา วิญฺญาณํ ฯ อตีเต สงฺขาเร อารพฺภ เย กิเลสา อุปฺปชฺเชยฺยุํ เต กิเลเส หิตฺวา จชิตฺวา ปริจฺจชิตฺวา ปชหิตฺวา วิโนทิตฺวา ๒ พฺยนฺตีกริตฺวา อนภาวงฺคมิตฺวาติ ปุพฺพาสเว หิตฺวา ฯ นเว อกุพฺพนฺติ นวา วุจฺจนฺติ ปจฺจุปฺปนฺนา รูปํ เวทนา สญฺญา สงฺขารา วิญฺญาณํ ฯ ปจฺจุปฺปนฺเน สงฺขาเร อารพฺภ ฉนฺทํ อกุพฺพมาโน เปมํ อกุพฺพมาโน ราคํ อกุพฺพมาโน อชนยมาโน อสญฺชนยมาโน อนิพฺพตฺตยมาโน นาภินิพฺพตฺตยมาโนติ ปุพฺพาสเว หิตฺวา นเว อกุพฺพํ ฯ

[๖๙๒] น ฉนฺทคู โนปิ นิวิสฺสวาทีติ น ฉนฺทคูติ น ฉนฺทาคตึ #๑ ม. รูป ... สงฺขารวิญฺญาณา ฯ ๒ ม. วิโนเทตฺวา พฺยนฺตึกริตฺวา ฯ