กุสลวาทา ปณฺฑิตวาทา ธีรวาทา ญาณวาทา ๑ เหตุวาทา ลกฺขณวาทา การณวาทา ฐานวาทา สกาย ลทฺธิยาติ วิคฺคยฺห นานา กุสลา วทนฺติ ฯ

[๕๒๒] โย เอวํ ชานาติ ส เวทิ ธมฺมนฺติ โย อิมํ ธมฺมํ ทิฏฺฐึ ปฏิปทํ มคฺคํ ชานาติ โส ธมฺมํ เวทิ อญฺญาสิ อปสฺสิ ปฏิวิชฺฌีติ โย เอวํ ชานาติ ส เวทิ ธมฺมํ ฯ

[๕๒๓] อิทํ ปฏิกฺโกสมเกวลี โสติ โย อิมํ ธมฺมํ ทิฏฺฐึ ปฏิปทํ มคฺคํ ปฏิกฺโกสติ อเกวลี โส อสมตฺโต อปริปุณฺโณ หีโน นิหีโน โอมโก ลามโก ชตุกฺโก ปริตฺโตติ อิทํ ปฏิกฺโกสมเกวลี โส ฯ เตนาห โส นิมฺมิโต

สกํ สกํ ทิฏฺฐิปริพฺพสานา

วิคฺคยฺห นานา กุสลา วทนฺติ

โย เอวํ ชานาติ ส เวทิ ธมฺมํ

อิทํ ปฏิกฺโกสมเกวลี โสติ ฯ

[๕๒๔] เอวมฺปิ วิคฺคยฺห วิวาทยนฺติ ๒

พาโล ปโร อกุสโลติ จาหุ

สจฺโจ นุ วาโท กตโม อิเมสํ

สพฺเพว หีเม กุสลาวทานา ฯ

[๕๒๕] เอวมฺปิ วิคฺคยฺห วิวาทยนฺตีติ เอวํ คเหตฺวา อุคฺคเหตฺวา คณฺหิตฺวา ปรามสิตฺวา อภินิวิสิตฺวา วิวาทยนฺติ กลหํ กโรนฺติ #๑ ม. ญายวาทา ฯ สพฺพตฺถ เอวํ ญาตพฺพํ ฯ ๒ ยุ. วิวาทิยนฺติ ฯ #สพฺพตฺถ อีทิสเมว ฯ