วีชนึ ปคฺคเหตฺวาน สตฺถา โลกคฺคนายโก

ภิกฺขุสงฺเฆ ฐิโต สนฺโต อิมา คาถา อภาสถ ฯ

อิมินา วีชนิทาเนน จิตฺตสฺส ปณิธีหิ จ

กปฺปานํ สตสหสฺสํ วินิปาตํ น คจฺฉติ ฯ

อารทฺธวิริโย ปหิตตฺโต เจโตคุณสมาหิโต

ชาติยา สตฺตวสฺโสหํ อรหตฺตํ อปาปุณึ ฯ

สฏฺฐิกปฺปสหสฺสมฺหิ พิชฺชมานสนามกา

โสฬสาสึสุ ราชาโน จกฺกวตฺตี มหพฺพลา ฯ

ปฏิสมฺภิทา จตสฺโส วิโมกฺขาปิจ อฏฺฐิเม

ฉฬภิญฺญา สจฺฉิกตา กตํ พุทฺธสฺส สาสนนฺติ ฯ

อิตฺถํ สุทํ อายสฺมา วิธูปนทายโก เถโร อิมา คาถาโย อภาสิตฺถาติ ฯ

วิธูปนทายกตฺเถรสฺส อปทานํ สมตฺตํ ฯ

______________

ทุติยํ สตรํสิยตฺเถราปทานํ (๕๒)

[๕๔] อุพฺพิทฺธํ เสลมารุยฺห นิสีทิ ปุริสุตฺตโม

ปพฺพตสฺสาวิทูรมฺหิ พฺราหฺมโณ มนฺตปารคู ฯ

อุปวิฏฺฐํ มหาวีรํ เทวเทวํ นราสภํ

อญฺชลึ ปคฺคเหตฺวาน สนฺถวึ โลกนายกํ ฯ