เอกตฺตึเส อิโต กปฺเป ยํ ปูชมกรึ ตทา
ทุคฺคตึ นาภิชานามิ โพธิปูชายิทํ ผลํ ฯ
อิโต ฉพฺพีสติกปฺเป อหุ เมฆพฺภนามโก
สตฺตรตนสมฺปนฺโน จกฺกวตฺติ มหพฺพโล ฯ
ปฏิสมฺภิทา จตสฺโส วิโมกฺขาปิจ อฏฺฐิเม
ฉฬภิญฺญา สจฺฉิกตา กตํ พุทฺธสฺส สาสนนฺติ ฯ
อิตฺถํ สุทํ อายสฺมา มิญฺชวฏํสกิโย เถโร อิมา คาถาโย อภาสิตฺถาติ ฯ
มิญฺชวฏํสกิยตฺเถรสฺส อปทานํ สมตฺตํ ฯ
นวมํ สุกตาเวฬิยตฺเถราปทานํ (๒๒๙)
[๒๓๑] อสิโต นาม นาเมน มาลากาโร อหํ ตทา
อาเวฬํ ปคฺคเหตฺวาน รญฺโญ ทาตุํ วชามหํ ฯ
อสมฺปตฺโตมฺหิ ราชานํ อทฺทสํ สิขินายกํ
หฏฺโฐ หฏฺเฐน จิตฺเตน พุทฺธสฺส อภิโรปยึ ฯ
เอกตฺตึเส อิโต กปฺเป ยํ ปุปฺผมภิโรปยึ
ทุคฺคตึ นาภิชานามิ พุทฺธปูชายิทํ ผลํ ฯ
ปญฺจวีเส อิโต กปฺเป ราชา โหมิ มหพฺพโล
เวภาโร นาม นาเมน จกฺกวตฺติ มหพฺพโล ฯ