ยโต วิจิกิจฺฉานุสเยน นิรนุสโย โส ตโต มานานุสเยน นิรนุสโยติ: ตโย ปุคฺคลา กามธาตุยา ทฺวีสุ เวทนาสุ รูปธาตุยา อรูปธาตุยา เต ตโต วิจิกิจฺฉานุสเยน นิรนุสยา โน จ เต ตโต มานานุสเยน นิรนุสยา เตว ปุคฺคลา ทุกฺขาย เวทนาย อปริยาปนฺเน เต ตโต วิจิกิจฺฉานุสเยน จ นิรนุสยา มานานุสเยน จ นิรนุสยา อรหา สพฺพตฺถ วิจิกิจฺฉานุสเยน จ นิรนุสโย มานานุสเยน จ นิรนุสโย ฯ โย ยโต มานานุสเยน นิรนุสโย โส ตโต ภวราคานุสเยน นิรนุสโยติ: อามนฺตา ฯ โย วา ปน ยโต ภวราคานุสเยน นิรนุสโย โส ตโต มานานุสเยน นิรนุสโยติ: จตฺตาโร ปุคฺคลา กามธาตุยา ทฺวีสุ เวทนาสุ เต ตโต ภวราคานุสเยน นิรนุสยา โน จ เต ตโต มานานุสเยน นิรนุสยา เตว ปุคฺคลา ทุกฺขาย เวทนาย อปริยาปนฺเน เต ตโต ภวราคานุสเยน จ นิรนุสยา มานานุสเยน จ นิรนุสยา อรหา สพฺพตฺถ ภวราคานุสเยน จ นิรนุสโย มานานุสเยน จ นิรนุสโย ฯ โย ยโต มานานุสเยน นิรนุสโย โส ตโต อวิชฺชานุสเยน นิรนุสโยติ: จตฺตาโร ปุคฺคลา ทุกฺขาย เวทนาย เต ตโต มานานุสเยน นิรนุสยา โน จ เต ตโต อวิชฺชานุสเยน นิรนุสยา เตว ปุคฺคลา อปริยาปนฺเน เต ตโต มานานุสเยน จ นิรนุสยา อวิชฺชานุสเยน จ นิรนุสยา อรหา สพฺพตฺถ มานานุสเยน จ นิรนุสโย อวิชฺชานุสเยน จ นิรนุสโย ฯ โย วา ปน ยโต อวิชฺชานุสเยน นิรนุสโย โส ตโต มานานุสเยน นิรนุสโยติ: อามนฺตา ฯ
