ทุกฺขนฺเต ปฏิเวเทนฺติ ทูเร วงฺกตปพฺพโต ฯ

[๑๑๐๙] ยทิ ปสฺสนฺติ ปวเน ทารกา ผลิเต ๑ ทุเม

เตสํ ผลานํ เหตุมฺหิ อุปโรทนฺติ ทารกา ฯ

โรทนฺเต ทารเก ทิสฺวา อุพฺพิคฺคา ๒ วิปุลา ทุมา

สยเมโวนมิตฺวาน อุปคจฺฉนฺติ ทารเก ฯ

อิทํ อจฺเฉรกํ ทิสฺวา อพฺภูตํ โลมหํสนํ

สาธุการํ ปวตฺเตสิ มทฺที สพฺพงฺคโสภนา ฯ

อจฺเฉรํ วต โลกสฺมึ อพฺภูตํ โลมหํสนํ

เวสฺสนฺตรสฺส เตเชน สยเมโวนตา ทุมา ฯ

[๑๑๑๐] สงฺขิปึสุ ปถํ ยกฺขา อนุกมฺปาย ทารเก

นิกฺขนฺตทิวเสเนว เจตรฏฺฐมุปาคมม ฯ

[๑๑๑๑] เต คนฺตฺวา ทีฆมทฺธานํ เจตรฏฺฐมุปาคมม

อิทฺธํ ผีตํ ชนปทํ พหุมํสสุโรทกํ ฯ

[๑๑๑๒] เจติโย ปริกรึสุ ๓ ทิสฺวา ลกฺขณมาคตํ

สุขุมาลี วตายยฺยา ๔ ปตฺติกา ปริธาวติ ฯ

วยฺหาหิ ปริยายิตฺวา สิวิกาย รเถน จ

สาชฺช มทฺที อรญฺญสฺมึ ปตฺติกา ปริธาวติ ฯ

[๑๑๑๓] ตํ ทิสฺวา เจตปาโมกฺขา โรทมานา อุปาคมม

กจฺจิ นุ เทว กุสลํ กจฺจิ เทว อนามยํ ฯ #๑ ม. ผลิเน ฯ ๒ ม. อุพฺพิทฺธา ฯ ๓ ม. ปริวารึสุ ฯ ๔ ม. วต อยฺยา ฯ