ตุริยตาลิตสงฺฆุฏฺฐํ มณิมฺหิ ปสฺส นิมฺมิตํ ฯ
ลงฺฆิกา มุฏฺฐิกา เจตฺถ มายาการา จ โสภิยา
เวตาลิเก จ ชลฺเล จ มณิมฺหิ ปสฺส นิมฺมิตํ ฯ
[๙๒๘] สมชฺชา เจตฺถ วตฺตนฺติ อากิณฺณา นรนาริภิ
มญฺจาติมญฺเจ ภูมิโย มณิมฺหิ ปสฺส นิมฺมิตํ ฯ
ปสฺส มลฺเล สมชฺชสฺมึ โปเถนฺเต ๑ ทิคุณํ ภุชํ
นิหเต นิหตมาเน จ มณิมฺหิ ปสฺส นิมฺมิตํ ฯ
[๙๒๙] ปสฺส ปพฺพตปาเทสุ นานามิคคณา พหู
สีหา พฺยคฺฆา วราหา จ อจฺฉโกกตรจฺฉโย ฯ
ปลสตา ควชา จ มหึสา โรหิตา รุรู
เอเณยฺยา สรภา เจว คณิโน นิกฺกสูกรา ฯ
กทลิมิคา พหู จิตฺรา วิฬารา สสกณฺณกา
นานามิคคณากิณฺณํ มณิมฺหิ ปสฺส นิมฺมิตํ ฯ
[๙๓๐] นชฺชาโย สุปติตฺถาโย โสวณฺณวาลุกสนฺถตา
อจฺฉา สวนฺติ อมฺพูนิ มจฺฉคุมฺพนิเวสิตา ฯ
กุมฺภิลา มกรา เจตฺถ สสสุมารา จ กจฺฉปา
ปาฐีนา พหุสา ๒ มจฺฉา พลชา มุญฺชโรหิตา ฯ
นานาทิชคณากิณฺณา นานาทุมคณายุตา
เวฬุริยผลกโรทาโย มณิมฺหิ ปสฺส นิมฺมิตํ ฯ #๑ ม. โผเฏนฺเต ฯ ๒ สี. ม. ปาวุสา ฯ