สุตฺตนิปาเต ทุติยสฺส จูฬวคฺคสฺส

เตรสมํ สมฺมาปริพฺพาชนิยสุตฺตํ

[๓๓๑] ๑๓ ปุจฺฉามิ มุนึ ปหูตปญฺญํ

ติณฺณํ (ปารคตํ ๑-) ปรินิพฺพุตํ ฐิตตฺตํ

นิกฺขมฺม ฆรา ปนุชฺช กาเม

กถํ (ภิกฺขุ) สมฺมา โส โลเก ปริพฺพเชยฺย ฯ

ยสฺส มงฺคลา สมูหตา (ติ ภควา)

อุปฺปาตา ๒ สุปินา จ ลกฺขณา จ

ส ๓ มงฺคลโทสวิปฺปหีโน

(ภิกฺขุ) สมฺมา โส โลเก ปริพฺพเชยฺย ฯ

ราคํ วินเยถ มานุเสสุ

ทิพฺเพสุ กาเมสุ จาปิ ภิกฺขุ

อติกฺกมฺม ภวํ สเมจฺจ ธมฺมํ

สมฺมา โส โลเก ปริพฺพเชยฺย ฯ

วิปิฏฺฐิกตฺวา ๔ เปสุณานิ

โกธํ กทริยํ ชเหยฺย ภิกฺขุ

อนุโรธวิโรธวิปฺปหีโน

สมฺมา โส โลเก ปริพฺพเชยฺย ฯ

#๑ ม. ปารํ คตํ ฯ ๒ ยุ. อุปฺปาทา ฯ ๓ ม. โส ฯ ๔ ม. วิปิฏฺฐิกตฺวาน ฯ #โป. วิปิฏฺฐกริตฺวา ฯ