ปหานํ ปหานํ อรหตฺตํ วุตฺตํ ภควตาติ ฯ อามนฺตา ฯ หญฺจิ รูปราคอรูปราคมานอุทฺธจฺจอวิชฺชาย อนวเสสปฺปหานํ อรหตฺตํ วุตฺตํ ภควตา โน วต เร วตฺตพฺเพ อรหตฺตมคฺเคน สพฺเพ สญฺโญชนา ปหียนฺตีติ ฯ

[๑๐๒๕] น วตฺตพฺพํ สพฺพสญฺโญชนานํ ปหานํ อรหตฺตนฺติ ฯ อามนฺตา ฯ นนุ อรหโต สพฺเพ สญฺโญชนา ปหีนาติ ฯ อามนฺตา ฯ หญฺจิ อรหโต สพฺเพ สญฺโญชนา ปหีนา เตน วต เร วตฺตพฺเพ สพฺพสญฺโญชนานํ ปหานํ อรหตฺตนฺติ ฯ

สพฺพสญฺโญชนปฺปหานกถา ฯ

จตุตฺโถ วคฺโค ฯ

ตสฺส อุทฺทานํ

คิหิสฺส อรหา สห อุปปตฺติยา อรหา

อรหโต สพฺเพ ธมฺมา อนาสวา อรหา

จตูหิ ผเลหิ สมนฺนาคโต เอวเมว

ฉหิ อุเปกฺขาหิ โพธิยา พุทฺโธ สหํ ๑

ลกฺขณสมนฺนาคโต โพธิสตฺโต

โอกฺกนฺตนิยาโม จริตพฺรหฺมจริโย

ปฏิปนฺนโก ผเลน สมนฺนาคโต

สพฺพสญฺโญชนานํ ปหานํ อรหตฺตนฺติ ฯ

________________

#๑. ม. สลกฺขณสมนฺนาคโต.