อนุปุพฺพวิหารสมาปตฺตีนํ ลาภีติ ฯ อามนฺตา ฯ หญฺจิ อตฺถิ อฏฺฐวิโมกฺขฌายี จตุนฺนํ ฌานานํ นิกามลาภี นวนฺนํ อนุปุพฺพวิหารสมาปตฺตีนํ สมาปตฺตีนํ ลาภี เตน วต เร วตฺตพฺเพ อตีตานาคเตหิ สมนฺนาคโตติ ฯ

อตีตานาคตปจฺจุปฺปนฺนกถา ฯ

นวโม วคฺโค ฯ

ตสฺส อุทฺทานํ

อานิสํสทสฺสาวิสฺส สญฺโญชนานํ ปหานํ

อมตารมฺมณํ สญฺโญชนํ รูปํ สารมฺมณํ

อนุสยา อนารมฺมณา เอวเมว ญาณํ อตีตานาคตารมฺมณํ

จิตฺตํ สพฺพํ จิตฺตํ วิตกฺกานุปติตํ

สพฺพโส วิตกฺกยโต วิจารยโต

วิตกฺกวิปฺผาโร สทฺโท นยถาจิตฺตสฺส วาจา

ตเถว กายกมฺมํ อตีตานาคเตหิ สมนฺนาคโตติ ฯ

____________

นิโรธกถา

[๑๓๗๕] อุปปตฺเตสิเย ปญฺจกฺขนฺเธ อนิรุทฺเธ กิริยา ปญฺจ ขนฺธา อุปฺปชฺชนฺตีติ ฯ อามนฺตา ฯ ทสนฺนํ ขนฺธานํ สโมธานํ โหติ ทส ขนฺธา สมฺมุขีภาวํ อาคจฺฉนฺตีติ ฯ น เหวํ วตฺตพฺเพ ฯเปฯ ทสนฺนํ ขนฺธานํ สโมธานํ โหติ ทส ขนฺธา สมฺมุขีภาวํ