[๑๓๕๐] อนาคตํ อารพฺภ อตฺถิ อาวชฺชนา ฯเปฯ ปณิธิ อนาคตารมฺมณํ จิตฺตํ อนารมฺมณนฺติ ฯ อามนฺตา ฯ ปจฺจุปฺปนฺนํ อารพฺภ อตฺถิ อาวชฺชนา ฯเปฯ ปณิธิ ปจฺจุปฺปนฺนารมฺมณํ จิตฺตํ อนารมฺมณนฺติ ฯ น เหวํ วตฺตพฺเพ ฯเปฯ

[๑๓๕๑] น วตฺตพฺพํ อตีตานาคตารมฺมณํ จิตฺตํ อนารมฺมณนฺติ ฯ อามนฺตา ฯ นนุ อตีตานาคตํ นตฺถีติ ฯ อามนฺตา ฯ หญฺจิ อตีตานาคตํ นตฺถิ เตน วต เร วตฺตพฺเพ อตีตานาคตารมฺมณํ จิตฺตํ อนารมฺมณนฺติ ฯเปฯ

อนาคตารมฺมณกถา

______________

วิตกฺกานุปติตกถา

[๑๓๕๒] สพฺพํ จิตฺตํ วิตกฺกานุปติตนฺติ ฯ อามนฺตา ฯ สพฺพํ จิตฺตํ วิจารานุปติตํ ปีตานุปติตํ สุขานุปติตํ ทุกฺขานุปติตํ โสมนสฺสานุปติตํ โทมนสฺสานุปติตํ อุเปกฺขานุปติตํ สทฺธานุปติตํ วิริยานุปติตํ สตานุปติตํ สมาธานุปติตํ ปญฺญานุปติตํ ราคานุปติตํ โทสานุปติตํ ฯเปฯ อโนตฺตปฺปานุปติตนฺติ ฯ น เหวํ วตฺตพฺเพ ฯเปฯ

[๑๓๕๓] สพฺพํ จิตฺตํ วิตกฺกานุปติตนฺติ ฯ อามนฺตา ฯ นนุ อตฺถิ อวิตกฺโก วิจารมตฺโต สมาธีติ ฯ อามนฺตา ฯ หญฺจิ อตฺถิ อวิตกฺโก วิจารมตฺโต สมาธิ โน วต เร วตฺตพฺเพ สพฺพํ จิตฺตํ