อตฺถิ โลกิยา ปญฺญา นตฺถิ โลกิยํ ปญฺญินฺทฺริยนฺติ ฯ อามนฺตา ฯ อตฺถิ โลกุตฺตรา ปญฺญา นตฺถิ โลกุตฺตรํ ปญฺญินฺทฺริยนฺติ ฯ น เหวํ วตฺตพฺเพ ฯเปฯ

[๑๘๐๘] นตฺถิ โลกิยานิ ปญฺจินฺทฺริยานีติ ฯ อามนฺตา ฯ นนุ วุตฺตํ ภควตา อทฺทสํ โข อหํ ภิกฺขเว พุทฺธจกฺขุนา โลกํ โวโลเกนฺโต สตฺเต อปฺปรชกฺเข มหารชกฺเข ติกฺขินฺทฺริเย มุทินฺทฺริเย สฺวากาเร ทฺวากาเร สุวิญฺญาปเย ทุวิญฺญาปเย อปฺเปกจฺเจ ปรโลกวชฺชภยทสฺสาวิโน วิหรนฺเตติ ๑ อตฺเถว สุตฺตนฺโตติ ฯ อามนฺตา ฯ เตน หิ อตฺถิ โลกิยานิ ปญฺจินฺทฺริยานีติ ฯ

อินฺทฺริยกถา ฯ

เอกูนวีสติโม วคฺโค ฯ

ตสฺส อุทฺทานํ

อตีเต กิเลเส ชหติ อนาคเต กิเลเส

ชหติ ปจฺจุปฺปนฺเน กิเลเส ชหติ สุญฺญตา

สงฺขารกฺขนฺธปริยาปนฺนา สามญฺญผลํ อสงฺขตํ

ปตฺติ อสงฺขตา สพฺพธมฺมานํ ตถตา อสงฺขตา

นิพฺพานธาตุ กุสลา อตฺถิ ปุถุชฺชนสฺส อจฺจนฺตนิยามตา

นตฺถิ โลกิยานิ ปญฺจินฺทฺริยานีติ ฯ

#๑. ม. มู. ๓๑๐ ฯ