๘ กณเวรชาตกํ
[๕๗๐] ยนฺตํ วสนฺตสมเย กณเวเรสุ ภาณุสุ
สามํ พาหาย ปีเฬสิ สา ตํ อาโรคฺยมพฺรวิ ฯ
[๕๗๑] อมฺโภ น กิร สทฺเธยฺยํ ยํ วาโต ปพฺพตํ วเห
ปพฺพตญฺเจ วเห วาโต สพฺพมฺปิ ปฐวึ วเห
ยตฺถ สามา กาลกตา สามํ อาโรคฺยมพฺรวิ ฯ
[๕๗๒] น เจว สา กาลกตา น จ สา อญฺญมิจฺฉติ
เอกภตฺตา ๑ กิร สามา ตเมว อภิกงฺขติ ฯ
[๕๗๓] อสนฺถุตํ มํ จิรสนฺถุเตน
นิมินิ สามา อธุวํ ธุเวน
มยาปิ สามา นิมิเนยฺย อญฺญํ
อิโต อหํ ทูรตรํ คมิสฺสนฺติ ฯ
กณเวรชาตกํ อฏฺฐมํ ฯ
___________
๙ ติตฺติรชาตกํ
[๕๗๔] สุสุขํ วต ชึวามิ ลภามิ เจว ภุญฺชิตุํ
ปริปนฺเถว ติฏฺฐามิ กา นุ ภนฺเต คตี มม ฯ
[๕๗๕] มโน เจ เต นปฺปณมติ ปกฺขิ ปาปสฺส กมฺมุโน
อวฺยาวฏสฺส ภทฺรสฺส น ปาปมุปลิมฺปติ ฯ
[๕๗๖] ญาตโก โน นิสินฺโนติ พหุ อาคจฺฉเต ชโน #๑ ม. เอกรตฺติกิรี ฯ ยุ. เอกภตฺตกิรี ฯ