[๒๐๒๑] อเปตา เต จ พฺราหฺมญฺญา (อิติ ราชา จ โกรโพฺย)

น เต วุจฺจนฺติ พฺราหฺมณา

อญฺเญ วิธูร ปริเยส สีลวนฺเต พหุสฺสุเต

วิรเต เมถุนา ธมฺมา เย เม ภุญฺเชยฺยุ โภชนํ

ทกฺขิณํ สมฺม ทสฺสาม ยตฺถ ทินฺนํ มหปฺผลํ ฯ

[๒๐๒๒] อตฺถิ โข พฺราหฺมณา เทว สีลวนฺโต พหุสฺสุตา

วิรตา เมถุนา ธมฺมา เย เต ภุญฺเชยฺยุ โภชนํ ฯ

เอกญฺจ ภตฺตํ ภุญฺชนฺติ น จ มชฺชํ ปิวนฺติ เต

อกฺขาตา เต มหาราช ตาทิเส นิปตามเส ฯ

[๒๐๒๓] เอเต โข พฺราหฺมณา วิธูร สีลวนฺโต พหุสฺสุตา

เอเต วิธูร ปริเยส ขิปฺปญฺจ เน นิมนฺตยาติ ฯ

ทสพฺราหฺมณชาตกํ ทฺวาทสมํ ฯ

_____________________

๑๓ ภิกฺขาปรมฺปรชาตกํ

[๒๐๒๔] สุขุมาลรูปํ ทิสฺวา รฏฺฐา วิวนมาคตํ

กูฏาคารวรูเปตํ มหาสยนมุโปจิตํ ๑

ตสฺส เต เปมเกนาหํ อทาสึ วฑฺฒโมทนํ ๒

สาลีนํ วิจิตฺตํ ภตฺตํ สุจิมํสูปเสจนํ ๓

ตํ ตฺวํ ภตฺตํ ปฏิคฺคยฺห พฺราหฺมณสฺส อทาปยิ ๔ #๑ มหาสยนมุปาสิตนฺติปิ ฯ ๒ สี. ยุ. พทฺธโมทนํ ฯ ๓ ม. สุจึ มํสูปเสจนํ ฯ #เอวมุปริปิ ฯ ๔ ม. อทาสยิ ฯ