[๒๕๑๒] สํวจฺฉโร เม วสโต ๑ ตวนฺติเก

อนฺเนน ปาเนน อุปฏฺฐิโตสฺมิ

อามนฺตยิตฺวาน ปเลมิ นาค

จิรปฺปวุฏฺโฐสฺมิ อหํ ชนินฺท ฯ

[๒๕๑๓] ปุตฺตา จ ทารา อนุชีวิโน จ

นิจฺจานุสิฏฺฐา อุปติฏฺฐเต ตํ

กจฺจินุ เต นาภิสํสิตฺถ โกจิ

ปิยญฺหิ เม ทสฺสนํ ตุยฺห อฬาร ฯ

[๒๕๑๔] ยถาปิ มาตุ จ ปิตุ อคาเร

ปุตฺโต ปิโย ปฏิวิหิโต วเสยฺย ๒

ตโตปิ มยฺหํ อิธเมว เสยฺโย

จิตฺตญฺหิ เต นาค มยิ ปสนฺนํ ฯ

[๒๕๑๕] มณิ มมํ วิชฺชติ โลหิตงฺโค

ธนาหโร มณิรตนํ อุฬารํ

อาทาย ตฺวํ คจฺฉ สกํ นิเกตํ

ลทฺธา ธนนฺตํ มณิโมสฺสชสฺสุ ฯ

[๒๕๑๖] ทิฏฺฐา มยา มานุสกาปิ กามา

อสสฺสตา วิปริณามธมฺมา

อาทีนวํ กามคุเณสุ ทิสฺวา

สทฺธายหํ ปพฺพชิโตมฺหิ ราช ฯ

#๑ ยุ. วุสิโต ฯ ๒ ยุ. วเสยฺโย ฯ