อิตฺถีปิ ปณฺฑิตา โหติ ลหุมตฺถํ วิจินฺติกา ฯ

[๑๑๔๓] ลหุญฺจ วต ขิปฺปญฺจ นิกฏฺเฐ สมเจตยิ

มิคํ ปุณฺณายตเนว ๑ สุลสา สตฺตุกํ วธิ ฯ

[๑๑๔๔] โยธ อุปฺปติตํ อตฺถํ น ขิปฺปมนุพุชฺฌติ

โส หญฺญเต มนฺทมตี โจโรว คิริคพฺภเร ฯ

[๑๑๔๕] โยธ ๒ อุปฺปติตํ อตฺถํ ขิปฺปเมว นิโพธติ

มุจฺจเต สตฺตุสมฺพาธา สุลสา สตฺตุกามิวาติ ฯ

สุลสาชาตกํ ตติยํ

๔ สุมงฺคลชาตกํ

[๑๑๔๖] ภุสมฺหิ กุทฺโธติ อเปกฺขิยาน

น ตาว ทณฺฑํ ปนเยยฺย อิสฺสโร

อฏฺฐานโส อปฺปฏิรูปมตฺตโน

ปรสฺส ทุกฺขานิ ภุสํ อุทีรเย ฯ

[๑๑๔๗] ยโต จ ชาเนยฺย ปสาทมตฺตโน

อตฺถํ นิยุญฺเชยฺย ปรสฺส ทุกฺกฏํ

ตทายมตฺโถติ สยํ อเวกฺขิย

อถสฺส ทณฺฑํ สทิสํ นิเวสเย ฯ

[๑๑๔๘] น จาปิ ฌาเปติ ปรํ น อตฺตนํ

อมุจฺฉิโต โย นยเต นยานยํ

#๑ ม. ปุณฺณายเตเนว ฯ ๒ ม. โย จ ฯ