ตํ หิสฺส ทีปญฺจ ปรายนญฺจ

น เตน เมตฺตึ ชิรเยถ ๑ ปญฺโญ ฯ

[๑๔๗๑] อลโส คิหี กามโภคี น สาธุ

อสญฺญโต ปพฺพชิโต น สาธุ

ราชา น สาธุ อนิสมฺมการี

โย ปณฺฑิโต โกธโน ตํ น สาธุ ฯ

[๑๔๗๒] นิสมฺม ขตฺติโย กยิรา นานิสมฺม ทิสมฺปติ

นิสมฺมการิโน ราช ยโส กิตฺตี จ วฑฺฒตีติ ฯ

ภูริปญฺหาชาตกํ จุทฺทสมํ ฯ

_______________

๑๕ มหามงฺคลชาตกํ

[๑๔๗๓] กึสุ นโร ชปฺปมธิจฺจ กาเล

กํ วา วิชฺชํ กตมํ วา สุตานํ

โส มจฺโจ อสฺมึ จ ปรมฺหิ โลเก

กถํกโร โสตฺถาเนน คุตฺโต ฯ

[๑๔๗๔] ยสฺส เทวา ปิตโร จ สพฺเพ

สิรึสปา ๒ สพฺพภูตานิ จาปิ

เมตฺตาย นิจฺจํ อปจิตานิ โหนฺติ

ภูเตสุ เว โสตฺถานํ ตทาหุ ฯ

[๑๔๗๕] โย สพฺพโลกสฺส นิวาตวุตฺติ

#๑ ม. ชรเยถ ฯ ๒ ม. สรีสปา ฯ