ฉฏฺฐํ พาหิยตฺเถราปทานํ (๕๓๖)

[๑๒๖] อิโต สตสหสฺสมฺหิ กปฺเป อุปฺปชฺชิ นายโก

มหปฺปโภ ติโลกคฺโค นาเมน ปทุมุตฺตโร ฯ

ขิปฺปาภิญฺญสฺส ภิกฺขุสฺส คุณํ กิตฺตยโต มุเน

สุตฺวา อุทคฺคจิตฺโตหํ การํ กตฺวา มเหสิโน ฯ

ทตฺวา สตฺตาหิกํ ทานํ สสิสฺสสฺส มุเน อหํ

อภิวาทิย สมฺพุทฺธํ ตํ ฐานํ ปตฺถยึ ตทา ฯ

ตโต มํ พฺยากริ พุทฺโธ เอตํ ปสฺสถ พฺราหฺมณํ

ปติตํ ปาทมูเล เม ปินสมฺปนฺนเวกฺขณํ ๑ ฯ

เหมยญฺโญปจิตงฺคํ อวทาตํ ตนุตฺตจํ

ปลมฺพพิมฺพตมฺโพฏฺฐํ สีตติณฺหสมนฺทิชํ ฯ

คุณกามํ พหุตรํ สมุทฺธคฺคตนุรุหํ

คุโณฆายตนีภูตํ ๒ ปีติสมฺผุลฺลิตานนํ ฯ

เอโส ปตฺถยเต ๓ ฐานํ ขิปฺปาภิญฺญสฺส ภิกฺขุโน

อนาคเต มหาวีโร โคตโม นาม เหสฺสติ ฯ

ตสฺส ธมฺเมสุ ทายาโท โอรโส ธมฺมนิมฺมิโต

พาหิโย นาม นาเมน เหสฺสติ สตฺถุสาวโก ฯ

ตทา ตุฏฺโฐ จ วุฏฺฐาย ยาวชีวํ มหามุนึ

การํ กตฺวา จุโต สคฺคํ อคา สภวนํ ยถา ฯ #๑ ม. จริยํ ปจฺจเวกฺขณํ ฯ ยุ. ปีนสํ ปจฺจเวกฺขณํ ฯ ๒ โป. ยุ. คุเณ... ฯ #๓ ยุ. ปตฺถยโต ฯ