ตโต กลฺลิกจิตฺตํ มํ ญตฺวาน นรสารถิ

มหานิทานํ เทเสสิ สุตฺตนฺตํ วินยาย เม ฯ

สุตฺวา สุตฺตนฺตเสฏฺฐนฺต ปุพฺพสญฺญมนุสฺสรึ

ตตฺถฏฺฐิตาวหํ สนฺตี ธมฺมจกฺขุํ วิโสธยึ ฯ

นิปติตฺวา มเหสิสฺส ปาทมูลมฺหิ ตาวเท

อจฺจยํ เทสนตฺถาย อิมํ วจนมพฺรวึ ฯ

นโม เต สพฺพทสฺสาวิ นโม เต กรุณาลย

นโม เต ติณฺณสํสาร นโม เต อมตนฺทุํ ฯ

ทิฏฺฐิคหนปกฺขนฺตา ๑ กามราควิโมหิตา

ตยา สมฺมา อุปาเยน วินีตา วินเย รตา ฯ

อทสฺสเนน วิหิตา ๒ ตาทิสานํ มเหสินํ

อนุโภนฺติ มหาทุกฺขํ สตฺตา สํสารสาคเร ฯ

ยทาหํ โลกสรณํ อรณํ มรณนฺตคํ ๓

นาทฺทสามิ มธุรตฺถํ เทเสสฺสามิ ๔ ตมจฺจยํ ฯ

มหาหิตํ วรทฺททํ ๕ อหิโตติ วิสงฺกิตา

โนเปสึ รูปนิรตา เทเสสฺสามิ ตมจฺจยํ ฯ

ตทา มธุรนิคฺโฆโส มหาการุณิโก ชิโน

อโวจ ติฏฺฐ เขเมติ สิญฺจนฺโต อมเตน มํ ฯ

ตทา ปณมฺม สิรสา กตฺวา จ นํ ปทกฺขิณํ

คนฺตฺวา ทิสฺวา นรปตึ อิมํ วจนมพฺรวึ ฯ #๑ ม. ...ปกฺขนฺทา ฯ ยุ. ...ปกฺขมานา ฯ ๒ ม. ยุ. วิโภคา ฯ ๓ ม. มรณนฺตคุํ ฯ #๔ ม. ยุ. เทสยามิ ฯ ๕ ยุ. มหาหิตํ ตํ วรทํ ฯ