สฺวาคตํ วต เม อาสิ พุทฺธเสฏฺฐสฺส สนฺติเก

ติสฺโส วิชฺชา อนุปฺปตฺตา กตํ พุทฺธสฺส สาสนํ ฯ

ปฏิสมฺภิทา จตสฺโส วิโมกฺขาปิจ อฏฺฐิเม

ฉฬภิญฺญา สจฺฉิกตา กตํ พุทฺธสฺส สาสนนฺติ ฯ

อิตฺถํ สุทํ อมฺพปาลี ภิกฺขุนี อิมา คาถาโย อภาสิตฺถาติ ฯ

อมฺพปาลีเถริยา อปทานํ สมตฺตํ ฯ

ทสมํ เสลาเถริยาปทานํ (๔๐)

[๑๘๐] อิมมฺหิ ภทฺทเก กปฺเป พฺรหฺมพนฺธุ มหายโส

กสฺสโป นาม นาเมน อุปฺปชฺชิ วทตํ วโร ฯ

สาวตฺถิยํ ปุรวเร อุปาสกกุเล อหํ

ปสุตา นํ ชินวรํ ทิสฺวา สุตฺวา จ เทสนํ ฯ

ตํ วีรํ สรณํ คนฺตฺวา สีลานิ จ สมาทยึ ๑

กทาจิ โส มหาวีโร มหาชนสมาคเม ฯ

อตฺตโน อภิสมฺโพธึ ปกาเสสิ นราสโภ

อนนุสฺสุตธมฺเมสุ ปุพฺเพ ทุกฺขาทิเกสุ จ ฯ

จกฺขุ ญาณญฺจ ปญฺญา จ วิชฺชาโลกํ ๒ จ อาสิ เม

ตํ สุตฺวา อุคฺคเหตฺวาน ปริปุจฺฉามิ ๓ ภิกฺขโว ฯ

เตน กมฺเมน สุกเตน เจตนาปณิธีหิ จ

ชหิตฺวา มานุสํ เทหํ ตาวตึสํ อคญฺฉหํ ฯ #๑ ม. สมาทิยึ ฯ ๒ ม. วิชฺชาโลโก ฯ ยุ. วิชฺชาโลกา ฯ ๓ ม. ยุ. ปริปุจฺฉิญฺจ ... ฯ