ยถา มนุสฺสา นทึ ตรนฺตา ปฏิติตฺถํ วิรชฺฌิย

เหฏฺฐาติตฺถํ คเหตฺวาน อุตฺตรนฺติ มหานทึ ฯ

เอวเมว มยํ สพฺเพ ยทิ มุญฺจามิมํ ชินํ

อนาคตมฺหิ อทฺธาเน เหสฺสาม สมฺมุขา อิมํ ฯ

ตสฺสาปิ วจนํ สุตฺวา ภิยฺโย จิตฺตํ ปสาทยึ

อุตฺตรึ วตฺตมธิฏฺฐาสึ ทสปารมิปูริยา ฯ

ตทาปิ ตํ พุทฺธธมฺมํ สริตฺวา อนุพฺรูหยึ

อาหริสฺสามิ ตํ ธมฺมํ ยํ มยฺหํ อภิปตฺถิตํ ฯ

นครํ สุธญฺญกํ ๑ นาม วิปุโล นาม ขตฺติโย

วิปุลา นาม ชนิกา เรวตสฺส มเหสิโน ฯ

ฉพฺพสฺสสหสฺสานิ ๒ อคารํ อชฺฌาวสิ โส

สุทสฺสโน จ ๓ รตนคฺฆิ อาเวโฬ จ วิภูสิโต

ปุญฺญกมฺมาภินิพฺพตฺตา ตโย ปาสาทมุตฺตมา ฯ

เตตฺตึสสตสหสฺสานิ ๔ นาริโย สมลงฺกตา

สุทสฺสนา นาม นารี ๕ วรุโณ นาม อตฺรโช ฯ

นิมิตฺเต จตุโร ทิสฺวา รถยาเนน นิกฺขมิ

อนูนสตฺตมาสานิ ปธานํ ปทหี ชิโน ฯ

พฺรหฺมุนา ยาจิโต สนฺโต เรวโต โลกนายโก

วตฺตจกฺโก มหาวีโร วรุณาราเม วสี ๖ ชิโน ฯ #๑ ม. สุธญฺญวตี ฯ ๒ ม. ฉ จ วสฺสสหสฺสานิ ฯ ยุ. ฉพฺพสฺสสตสหสฺสานิ ฯ #๓ ม. จสทฺโท นตฺถิ ฯ ๔ ม. เตตฺตึส จ สหสฺสานิ ฯ ยุ. เตตฺตึสสหสฺสานิ ฯ #๕ ยุ. เทวี ฯ ๖ ม. สิริฆเร ฯ ยุ. สิริฆเณ ฯ