อนุลา จ อุรุเวลา จ อเหสุํ อคฺคสาวิกา

โพธิ ตสฺส ภควโต นิโคฺรโธติ ปวุจฺจติ ฯ

สุมงฺคโล ฆฏิกาโร จ อเหสุํ อคฺคุปฏฺฐกา

วิชิตเสนา จ ภทฺทา จ อเหสุํ อคฺคุปฏฺฐิกา ฯ

อุจฺจตฺตเนน โส พุทฺโธ วีสติรตนมุคฺคโต ๑

วิชฺชุลฏฺฐิว อากาเส จนฺโทว คหปูริโต ฯ

วีสติวสฺสสหสฺสานิ อายุ ตสฺส มเหสิโน

ตาวตา ติฏฺฐมาโน โส ตาเรสิ ชนตํ พหุํ ฯ

ธมฺมตฬากํ มาปยิตฺวา ๒ สีลํ ทตฺวา วิเลปนํ

ธมฺมทุสฺสํ นิวาเสตฺวา ธมฺมมาลํ วิภชฺชิย ๓ ฯ

ธมฺมวิมลมาทาสํ ฐปยิตฺวา มหาชเน

เกจิ นิพฺพานํ ปตฺเถนฺตา ปสฺสนฺตุ เม อลงฺกรํ ฯ

สีลกญฺจุกํ ทตฺวาน ฌานกวจจมฺมิกํ ๔

ธมฺมจมฺมํ ปารุปิตฺวา ทตฺวา สนฺนาหมุตฺตมํ ฯ

สติผลกํ ทตฺวาน ติขิณญาณกุนฺติมํ

ธมฺมขคฺควรํ ทตฺวา สีลสตฺตุปฺปมทฺทนํ ๕ ฯ

เตวิชฺชาภูสํ ๖ ทตฺวาน อาเวฬํ จตุโร ผเล

ฉฬภิญฺญาภรณํ ทตฺวา ธมฺมปุปฺผปิลนฺธนํ ฯ

สทฺธมฺมปณฺฑรจฺฉตฺตํ ทตฺวา ปาปนิวารณํ

มาปยิตฺวา อภยํ ปุปฺผํ นิพฺพุโต โส สสาวโก ฯ #๑ ม. วีสติรตนุคฺคโต ฯ ๒ ยุ. มาเปตฺวา ฯ ๓ ยุ. วิราชิย ฯ ๔ ม. ...วมฺมิตํ ฯ #ยุ. ... วมฺมิกํ ฯ ๕ ม. ยุ. สีลสํสคฺคมทฺทนํ ฯ ๖ ม. เตวิชฺชาภูสนํ ทตฺวาน ฯ