ກູຕະທັນຕະສູດ: ບ້ານເມືອງສະຫງົບເພາະປາກທ້ອງອີ່ມ

ໃນກູຕະທັນຕະສູດ ທີຄະນິກາຍ ພາມກູຕະທັນຕະກຽມບູຊາຍັນໃຫຍ່ ຜູກງົວ ແບ້ ແລະ ແກະໄວ້ຢ່າງລະຫຼາຍຮ້ອຍໂຕເພື່ອຂ້າ ແລ້ວມາທູນຖາມພະພຸດທະເຈົ້າເຖິງວິທີບູຊາຍັນໃຫ້ຖືກຕ້ອງ

ພະພຸດທະເຈົ້າຊົງເລົ່າເລື່ອງພະເຈົ້າມະຫາວິຊິຕະລາດໃນອະດີດ ຜູ້ຕ້ອງການບູຊາມະຫາຍັນ ປຸໂລຫິດທູນວ່າ ບ້ານເມືອງຍັງມີໂຈນປຸ້ນຈີ້ ຖ້າພະລາຊາປາບດ້ວຍການຂ້າ ຈອງຈຳ ຫຼື ເນລະເທດ ກໍບໍ່ອາດກຳຈັດໄດ້ໝົດ ເພາະຄົນທີ່ເຫຼືອຈະຍັງບຽດບຽນຕໍ່ ວິທີທີ່ຖືກຄື ພະລາຊາຄວນໃຫ້ພັນພືດ ແລະ ອາຫານແກ່ຜູ້ເຮັດໄຮ່ໄຖນາ ແລະ ລ້ຽງງົວ ໃຫ້ທຶນແກ່ຜູ້ຄ້າຂາຍ ແລະ ໃຫ້ອາຫານກັບເບ້ຍລ້ຽງແກ່ຂ້າລາຊະການ ເມື່ອເຮັດແນວນັ້ນ ປະຊາຊົນກໍຕັ້ງໃຈເຮັດວຽກ ບ້ານເມືອງມັ່ງຄັ່ງ ບໍ່ມີໂຈນ ແລະ ຄົນກໍຢູ່ກັນແບບເປີດປະຕູເຮືອນໄດ້

ຈາກນັ້ນ ການບູຊາຍັນທີ່ພະລາຊາເຮັດ ກໍບໍ່ມີການຂ້າສັດ ບໍ່ຕັດຕົ້ນໄມ້ ໃຊ້ພຽງເນີຍໃສ ນ້ຳມັນ ນົມສົ້ມ ນ້ຳເຜິ້ງ ແລະ ນ້ຳອ້ອຍ ເມື່ອຟັງຈົບ ພາມກູຕະທັນຕະກໍປ່ອຍສັດທັງໝົດ ແລະ ປະກາດຕົນເປັນອຸບາສົກ