อนาคตํ วา ภิกฺขเว อทฺธานํ อารพฺภ กถํ กเถยฺย เอวํ ภวิสฺสติ อนาคตมทฺธานนฺติ เอตรหิ วา ภิกฺขเว ปจฺจุปฺปนฺนํ อทฺธานํ อารพฺภ กถํ กเถยฺย เอวํ โหติ เอตรหิ ปจฺจุปฺปนฺนนฺติ อิมานิ โข ภิกฺขเว ตีณิ กถาวตฺถูนีติ อตฺเถว สุตฺตนฺโตติ ฯ อามนฺตา ฯ เตนหิ มุหุตฺตํ ปรินิปฺผนฺนนฺติ ฯ

ขณลยมุหุตฺตกถา ฯ

______________

อาสวกถา

[๑๖๑๙] จตฺตาโร อาสวา อนาสวาติ ฯ อามนฺตา ฯ มคฺโค ผลํ นิพฺพานํ โสตาปตฺติมคฺโค โสตาปตฺติผลํ ฯเปฯ โพชฺฌงฺโคติ ฯ น เหวํ วตฺตพฺเพ ฯเปฯ น วตฺตพฺพํ จตฺตาโร อาสวา อนาสวาติ ฯ อามนฺตา ฯ อตฺถญฺเญว อนาสวา เยหิ อาสเวหิ เต อาสวา สาสวา โหนฺตีติ ฯ น เหวํ วตฺตพฺเพ ฯ เตน หิ จตฺตาโร อาสวา อนาสวาติ ฯ

อาสวกถา ฯ

________________

ชรามรณกถา

[๑๖๒๐] โลกุตฺตรานํ ธมฺมานํ ชรามรณํ โลกุตฺตรนฺติ ฯ อามนฺตา ฯ มคฺโค ผลํ นิพฺพานํ โสตาปตฺติมคฺโค โสตาปตฺติผลํ