ພິກຂຸນີວິພັງ: ຜັກທຽມໃນໄຮ່ ກັບຫົງຄຳທີ່ຖືກຖອນຂົນ

ໃນພິກຂຸນີວິພັງ ພະວິໄນປິດົກ ເຫຼັ້ມ 3 ລະສຸນະວັກ ສິກຂາບົດທີ 1 ເລົ່າວ່າ ອຸບາສົກຄົນໜຶ່ງປະວາລະນາຜັກທຽມໄວ້ແກ່ພິກຂຸນີສົງ ແລະ ສັ່ງຄົນເຝົ້າໄຮ່ໄວ້ວ່າ ຖ້າພິກຂຸນີມາຂໍ ໃຫ້ຖວາຍອົງລະສອງສາມກຳ ຊ່ວງນັ້ນເມືອງສາວັດຖີມີງານມະຫໍລະສົບ ຜັກທຽມທີ່ນຳມາຂາຍໝົດເກລ້ຽງ ອຸບາສົກຈຶ່ງບອກໃຫ້ພິກຂຸນີໄປທີ່ໄຮ່ ພິກຂຸນີຖຸນລະນັນທາໄປແລ້ວບໍ່ຮູ້ຈັກປະມານ ໃຫ້ຂົນຜັກທຽມໄປຫຼາຍ ຄົນເຝົ້າໄຮ່ຈຶ່ງຕຳໜິ

ພະຜູ້ມີພະພາກຊົງເລົ່າເລື່ອງໃນອະດີດວ່າ ຖຸນລະນັນທາເຄີຍເປັນເມຍຂອງພາມ ມີລູກສາວສາມຄົນ ເມື່ອພາມຕາຍໄປເກີດເປັນຫົງຂົນຄຳ ຫົງນັ້ນໃຫ້ຂົນຄຳແກ່ພວກນາງຄົນລະຂົນ ແຕ່ນາງຈັບພະຍາຫົງຖອນຂົນຈົນໝົດ ຂົນທີ່ງອກໃໝ່ກາຍເປັນສີຂາວ ແລ້ວຊົງຕັດຄາຖາວ່າ ໄດ້ສິ່ງໃດຄວນຍິນດີດ້ວຍສິ່ງນັ້ນ ເພາະຄວາມໂລບຈັດເປັນເຫດໃຫ້ເສື່ອມ ຈາກນັ້ນຈຶ່ງຊົງບັນຍັດຫ້າມພິກຂຸນີສັນຜັກທຽມ

ສິກຂາບົດທີ 7 ໃນວັກດຽວກັນ ເລົ່າວ່າໃນລະດູເກັບກ່ຽວເຂົ້າ ພິກຂຸນີຂໍເຂົ້າເປືອກສົດແລ້ວນຳເຂົ້າເມືອງ ຄົນທີ່ປະຕູເມືອງກັ້ນທາງເວົ້າຫຼິ້ນວ່າ "ແມ່ເຈົ້າ ແບ່ງໃຫ້ແດ່" ແລ້ວຈຶ່ງປ່ອຍໄປ ຊົງບັນຍັດຫ້າມຂໍ ຄົ່ວ ຕຳ ຫຼື ຫຸງເຂົ້າເປືອກສົດມາສັນ ທັງສອງຂໍ້ເປັນວິໄນຂອງພິກຂຸນີ ຄະລືຫັດບໍ່ໄດ້ຖືກຫ້າມກິນຜັກທຽມ ບົດຮຽນທີ່ນຳມາໃຊ້ໄດ້ຄືເລື່ອງຄວາມພໍດີໃນການຮັບນ້ຳໃຈຈາກຜູ້ອື່ນ