ປະຕິສາລະນີຍະກຳ: ພະສຸທຳມະຕ້ອງໄປຂໍຂະມາຈິດຕະຄະຫະບໍດີ

ໃນກຳມະຂັນທະກະ ຈູລະວັກ ພະວິໄນປິດົກ ພະສຸທຳມະເປັນເຈົ້າອາວາດທີ່ມັດສິກາສັນ ເບິ່ງແຍງວຽກກໍ່ສ້າງ ແລະ ຮັບພັດປະຈຳຈາກຈິດຕະຄະຫະບໍດີ ທຸກເທື່ອທີ່ຈິດຕະຄະຫະບໍດີຈະນິມົນສົງ ຫຼື ພິກຂຸຮູບໃດ ລາວຈະບອກພະສຸທຳມະກ່ອນສະເໝີ ເທື່ອໜຶ່ງພະເຖລະຫຼາຍຮູບ ເຊັ່ນ ພະສາລີບຸດ ພະມະຫາໂມກຄັນລານະ ພະອະນຸລຸດທະ ພະອຸບາລີ ພະອານົນ ແລະ ພະລາຫຸນ ຈາລິກມາຮອດ ຈິດຕະຄະຫະບໍດີຟັງທຳຈາກພະສາລີບຸດ ແລ້ວນິມົນພະເຖລະສັນໃນມື້ຕໍ່ມາ ຈາກນັ້ນຈຶ່ງໄປນິມົນພະສຸທຳມະ

ພະສຸທຳມະຄິດວ່າຈິດຕະຄະຫະບໍດີບໍ່ເອົາໃຈໃສ່ຕົນແລ້ວ ຈຶ່ງປະຕິເສດເຖິງສາມເທື່ອ ແຕ່ຕອນເຊົ້າກັບໄປເບິ່ງອາຫານທີ່ເຮືອນ ແລ້ວເວົ້າວ່າອາຫານມີຫຼາຍ ແຕ່ຂາດເຂົ້າໜົມງາຢ່າງໜຶ່ງ (ສະບັບແປໃຊ້ຄຳວ່າເຂົ້າໜົມແດກງາ) ຈິດຕະຄະຫະບໍດີຕອບວ່າ ພຸດທະວະຈະນະມີຫຼາຍມາຍ ແຕ່ທ່ານກັບເວົ້າເລື່ອງເຂົ້າໜົມ ແລ້ວປຽບກັບລູກໄກ່ທີ່ເກີດຈາກແມ່ໄກ່ກັບກາ ຈະຮ້ອງຄືກາກໍປົນສຽງໄກ່ ຈະຂັນຄືໄກ່ກໍປົນສຽງກາ ພະສຸທຳມະວ່າລາວດ່າຕົນ ຈະອອກຈາກອາວາດ ເຖິງແມ່ນຈິດຕະຄະຫະບໍດີຢືນຢັນວ່າບໍ່ໄດ້ດ່າ ແລະ ຂໍໃຫ້ຢູ່ຕໍ່ ທ່ານກໍໄປເຝົ້າພະພຸດທະເຈົ້າທີ່ສາວັດຖີ ແລະ ກາບທູນທຸກຄຳທີ່ທັງສອງເວົ້າກັນ

ພະພຸດທະເຈົ້າຊົງຕິຕຽນວ່າ ຈິດຕະຄະຫະບໍດີມີສັດທາ ເປັນຜູ້ໃຫ້ ເປັນຜູ້ບຳລຸງສົງ ເປັນຫຍັງຈຶ່ງເວົ້າກົດຂົ່ມລາວດ້ວຍຖ້ອຍຄຳເລວ ແລ້ວໃຫ້ສົງລົງປະຕິສາລະນີຍະກຳແກ່ພະສຸທຳມະ ຄືໃຫ້ໄປຂໍຂະມາຈິດຕະຄະຫະບໍດີ ຂັ້ນຕອນການລົງກຳ ແລະ ລະງັບກຳເປັນລະບຽບຂອງພິກຂຸສົງ ແຕ່ໃຈຄວາມເລື່ອງການໄປຂໍໂທດຄົນທີ່ເຮົາເຮັດໃຫ້ເສຍຫາຍໃຊ້ໄດ້ກັບທຸກຄົນ