สห โกเป สมุปฺปนฺเน สีลพฺพตมนุสฺสรึ

ตตฺเถว โกปํ นิคฺคณฺหึ นาทาสึ วฑฺฒิตูปริ ๑ ฯ

ยทิ ตํ พฺราหฺมณึ โกจิ โกฏฺเฏยฺย ติณฺหสตฺติยา

เนว สีลํ ปภินฺเทยฺยํ โพธิยา เยว การณา ฯ

น เม สา พฺราหฺมณี เทสฺสา นปิ เม พลํ น วิชฺชติ

สพฺพญฺญุตํ ปิยํ มยฺหํ ตสฺมา สีลานุรกฺขิสฺสนฺติ ฯ

จูฬโพธิจริยํ จตุตฺถํ ฯ

ปญฺจมํ มหิสราชจริยํ

[๑๕] ปุนาปรํ ยทา โหมิ มหิโส ๒ ปวนจารโณ

ปวฑฺฒกาโย พลวา มหนฺโต ภีมทสฺสโน ฯ

ปพฺภาเร คิริทุคฺเค จ รุกฺขมูเล ทกาสเย

โหเตตฺถ ฐานํ มหิสานํ โกจิ โกจิ ตหึ ตหึ ฯ

วิจรนฺโต พฺรหารญฺเญ ฐานมทฺทส ภทฺทกํ

ตํ ฐานํ อุปคนฺตฺวาน ติฏฺฐามิ จ สยามิ จ ฯ

อเถตฺถ กปิมาคนฺตฺวา ปาโป อนริโย ลหุ

ขนฺเธ นลาเต ภมุเก มุตฺเตติ โอหเนติ ตํ ฯ

สกึปิ ทิวสํ ทุติยํ ตติยํ จตุตฺถํปิจ

ทูเสติ มํ สพฺพกาลํ เตน โหมิ อุปทฺทุโต ฯ #๑ ยุ. วุฑฺฒิตุํ ปริ ฯ ๒ ม. ยุ. มหีโส ฯ อิโต ปรํ อีทิสเมว ฯ