นิเสธยิตฺวา ปจฺจนฺตํ ราชา กุหกมพฺรวิ

กจฺจิ ๑ ขมนียํ ตว สมฺมาโน เต ปวตฺติโต ฯ

ตสฺส อาจิกฺขตี ปาโป กุมาโร ยถา นาสิโย ๒

ตสฺส ตํ วจนํ สุตฺวา อาณาเปสิ มหีปติ ฯ

สีสํ ตตฺเถว ฉินฺทิตฺวา กตฺวาน จตุขณฺฑิกํ

รถิยา รถิยํ ทสฺเสถ สา คติ ชฏิลหีฬิตา ฯ

ตตฺถ ๓ เต กรณี คนฺตฺวา จณฺฑา ลุทฺธา ๔ อการุณา

มาตุ องฺเก นิสินฺนสฺส อากฑฺฒิตฺวา นยนฺติ มํ ฯ

เตสาหํ เอวมวจํ พนฺธตํ คาฬฺหพนฺธนํ

รญฺโญ ทสฺเสถ มํ ขิปฺปํ ราชกิริยานิ อตฺถิ เม ฯ

เต มํ รญฺโญ ทสฺสยึสุ ปาปสฺส ปาปเสวิโน

ทิสฺวาน ตํ สญฺญาเปสึ มม จ วสมานยึ ฯ

โส มํ ตตฺถ ขมาเปสิ มหารชฺชํ อทาสิ เม

โสหํ ตมํ ทาลยิตฺวา ปพฺพชึ อนคาริยํ ฯ

น เม เทสฺสํ มหารชฺชํ กามโภโค น เทสฺสิโย

สพฺพญฺญุตํ ปิยํ มยฺหํ ตสฺมา รชฺชํ ปริจฺจชินฺติ ฯ

โสมนสฺสจริยํ ทุติยํ ฯ

#๑ ม. ยุ. กิจฺจิ เต ภนฺเต ขมนียํ ฯ ๒ ยุ. นาสิโต ฯ ๓ ม. ตตฺถ การณิกา คนฺตฺวา ฯ #ยุ. ... การุณิกา ... ฯ ๔ ม. ยุ. ลุทฺทา ฯ