พฺรหฺมุนา ยาจิโต สนฺโต อโนมทสฺสี มหามุนิ

วตฺตจกฺโก มหาวีโร สุทสฺสนุยฺยานมุตฺตเม ฯ

นิสโภ จ อโนโม จ อเหสุํ อคฺคสาวกา

วรุโณ นามุปฏฺฐาโก อโนมทสฺสิสฺส สตฺถุโน ฯ

สุนฺทรา ๑ จ สุมนา จ อเหสุํ อคฺคสาวิกา

โพธิ ตสฺส ภควโต อชฺชุโนติ ปวุจฺจติ ฯ

นนฺทิวฑฺโฒ สิริวฑฺโฒ อเหสุํ อคฺคุปฏฺฐกา

อุปฺปลา จ ๒ ปทุมา จ อเหสุํ อคฺคุปฏฺฐิกา ฯ

อฏฺฐปณฺณาสรตนํ อจฺจุคฺคโต มหามุนิ

ปภา นิทฺธาวตี ตสฺส สตรํสีว อุคฺคโต ฯ

วสฺส สตสหสฺสานิ อายุ วิชฺชติ ตาวเท

ตาวตา ติฏฺฐมาโน โส ตาเรสิ ชนตํ พหุํ ฯ

สุปุปฺผิตํ ปาวจนํ อรหนฺเตหิ ตาทิหิ

วีตราเคหิ วิมเลหิ โสภติ ๓ ชินสาสนํ ฯ

โส จ สตฺถา อมิตยโส ยุคานิ ตานิ อตุลิยานิ

สพฺพํ สมนฺตรหิตํ นนุ ริตฺตา สพฺพสงฺขาราติ ฯ

อโนมทสฺสี ชิโน สตฺถา ธมฺมารามมฺหิ นิพฺพุโต

ตตฺเถว ตสฺส ชินถูโป อุพฺเพโธ ปน วีสตีติ ฯ

อโนมทสฺสิพุทฺธวํโส สตฺตโม ฯ

#๑ โป. สุนฺทรา จ สุนามา จ ฯ ม. ยุ. สุนฺทรี จ ฯ ๒ ม. ยุ. เจว ฯ #๓ ม. ยุ. โสภิตฺถ ฯ