ขิปฺปํ ปคฺคยฺห ตํ สพฺพํ อุเปตฺวา ๑ โลกนายกํ

ผลํ พุทฺธสฺส ทตฺวาน สาลปุปฺผํ อปูชยึ ฯ

จนฺทนํ อนุลิมฺปิตฺวา อวนฺทึ สตฺถุโน อหํ

ปสนฺนจิตฺโต สุมโน วิปุลาย จ ปีติยา ฯ

อชินมฺหิ นิสีทิตฺวา สุเมโธ โลกนายโก

มม กมฺมํ ปกิตฺเตสิ หาสยนฺโต มมํ ตทา ฯ

อิมินา ผลทาเนน คนฺธมาเลหิ จูภยํ

ปญฺจวีเส กปฺปสเต เทวโลเก รมิสฺสติ ฯ

อนูนมนสงฺกปฺโป วสวตฺติ ภวิสฺสติ

ฉพฺพีสติกปฺปสเต มนุสฺสตฺตํ คมิสฺสติ ฯ

ภวิสฺสติ จกฺกวตฺติ จาตุรนฺโต มหิทฺธิโก

เวกรํ ๒ นาม นครํ วิสุกมฺเมน มาปิตํ ฯ

เหสฺสติ สพฺพโสวณฺณํ นานารตนภูสิตํ

เอเตเนว อุปาเยน สํสริสฺสติ โยนิโย ๓ ฯ

สพฺพตฺถ สุขิโต ๔ หุตฺวา เทวตฺเต อถ มานุเส

ปจฺฉิเม ภวสมฺปตฺเต พฺรหฺมพนฺธุ ภวิสฺสติ ฯ

อคารา อภินิกฺขมฺม อนคาริ ภวิสฺสติ

อวิญฺญตฺติปจฺจโย ๕ หุตฺวา นิพฺพายิสฺสตินาสโว ฯ

อิทํ วตฺวาน สมฺพุทฺโธ สุเมโธ โลกนายโก

มม นิชฺฌายมานสฺส ปกฺกามิ อนิลญฺชเส ฯ #๑ ยุ. อุเปสึ ฯ ๒ ม. ยุ. เวภารํ ฯ ๓ ม. โส ภเว ฯ ยุ. โยนิโส ฯ #๔ ม. ปูชิโต ฯ ๕ ม. อภิญฺญาปารคู ฯ