อภิรูหตุ มํ พุทฺโธ อตฺถทสฺสี มหามุนิ

อหํ ตํ ตารยิสฺสามิ ทุกฺขสฺสนฺตํ กโร ตุวํ ฯ

มม สงฺกปฺปมญฺญาย อตฺถทสฺสี มหายโส

อาโรหิตฺวาน เม ปิฏฺฐึ อฏฺฐาสิ โลกนายโก ฯ

ยโต สรามิ อตฺตานํ ยโต ปตฺโตสฺมิ วิญฺญุตํ

สุขํ เม ตาทิสํ นตฺถิ ผุฏฺเฐ ๑ ปาทตเล ยถา ฯ

อุตฺตริตฺวาน สมฺพุทฺโธ อตฺถทสฺสี มหายโส

นทีตีรมฺหิ ฐตฺวาน อิมา คาถา อภาสถ ฯ

ยาวตา วตฺตเต จิตฺตํ คงฺคาโสตํ ตรามหํ

อยญฺจ กจฺฉโป ราชา ตาเรติ ๒ มม ปุญฺญวา ฯ

อิมินา พุทฺธตรเณน เมตฺตจิตฺตวตาย จ

อฏฺฐารเส กปฺปสเต เทวโลเก รมิสฺสติ ฯ

เทวโลกา อิธาคนฺตฺวา สุกฺกมูเลน โจทิโต

เอกาสเน นิสีทิตฺวา กงฺขาโสตํ ตริสฺสติ ฯ

ยถาปิ ภทฺทเก เขตฺเต พีชํ อปฺปมฺปิ โรปิตํ

สมฺมา ธารํ ๓ ปวสฺสนฺเต ผลํ โตเสติ กสฺสเก ๔ ฯ

ตเถวิทํ พุทฺธเขตฺตํ สมฺมาสมฺพุทฺธเทสิตํ

สมฺมา ธารํ ๓ ปวจฺฉนฺเต ผลํ มํ โตสยิสฺสติ ฯ

ปธานํ ปหิตตฺโตมฺหิ อุปสนฺโต นิรูปธิ

สพฺพาสเว ปริญฺญาย วิหรามิ อนาสโว ฯ #๑ โป. ยุ. ยถา ปาทตเล มุนิ ฯ ๒ ม. ตาเรสิ ฯ ๓ ม. ยุ. ธาเร ฯ ๔ ม. #กสฺสกํ ฯ