สตฺต มาลา คเหตฺวาน อุปฺปลา ๑ เทวคนฺธิกา

นิสชฺช ปาสาทวเร เอวํ จินฺเตสิ ตาวเท ฯ

กึ เม อิมาหิ มาลาหิ สิรสา โรปิตาหิ เม

วรํ เม พุทฺธเสฏฺฐสฺส ญาณมฺหิ อภิโรปิตํ ฯ

สมฺพุทฺธํ ปฏิมาเนนฺตี ทฺวาราสนฺเน นิสีทหํ

ยทา เอหิติ ๒ สมฺพุทฺโธ ปูชยิสฺสํ มหามุนึ ฯ

กกุโธ วิลสนฺโตว มิคราชาว เกสรี

ภิกฺขุสงฺเฆน สหิโต อาคจฺฉิ วีถิยา ชิโน ฯ

พุทฺธสฺส รํสึ ทิสฺวาน หฏฺฐา สํวิคฺคมานสา

ทฺวารํ อปาปุณิตฺวาน พุทฺธเสฏฺฐํ อปูชยึ ฯ

สตฺต อุปฺปลปุปฺผานิ สุวิตฺถิณฺณานิ ๓ อมฺพเร

ฉาทึ ๔ กโรนฺตา พุทฺธสฺส มตฺถเก ธารยนฺติ เต ฯ

อุทคฺคจิตฺตา สุมนา เวทชาตา กตญฺชลี

ตตฺถ จิตฺตํ ปสาเทตฺวา ตาวตึสํ อคญฺฉหํ ฯ

มหาเนลสฺส ฉาทนํ ธาเรนฺติ มม มุทฺธนิ

ทิพฺพคนฺธํ ปวายติ ๕ สตฺตุปฺปลานิทํ ผลํ ฯ

กทาจิ นียมานาย ญาติสงฺเฆน เม ตทา

ยาวตา ปริสา มยฺหํ มหาเนลํ ธรียติ ฯ

สตฺตติเทวราชูนํ มเหสิตฺตํ อการยึ

สพฺพตฺถ อิสฺสรา หุตฺวา สํสรามิ ภวาภเว ฯ #๑ ยุ. อุปฺปลี ฯ ๒ ยุ. เอติห ฯ ๓ ม. ปริกิณฺณานิ ฯ ยุ. ปริตฺถิณฺณานิ ฯ #๔ ม. ฉทึ ฯ ๕ ม. ยุ. ปวายามิ ฯ