นิสินฺนํ อทฺทสํ พุทฺธํ อุเทนฺตํว ปภงฺกรํ

ชลนฺตํ เหมเสลํว ทีปรุกฺขํว โชติตํ ฯ

สสึว ๑ ตาราสหิตํ สาวเกหิ ปุรกฺขตํ

วาสวํ วิย วสฺสนฺตํ เทเวน ๒ ชนนนฺทนํ ฯ

วนฺทิตฺวาน สหามจฺโจ เอกมนฺตํ อุปาวิสึ

ตโต ๓ อชฺฌาสยํ ญตฺวา พุทฺโธ ธมฺมมเทสยิ ฯ

สุตฺวาน ธมฺมํ วิมลํ อโวจุมฺห มยํ ชินํ

ปพฺพาเชหิ มหาวีร โอติณฺณมฺห ๔ ภเว มยํ ฯ

สฺวากฺขาโต ภิกฺขเว ธมฺโม ทุกฺขนฺตสฺส ๕ กราย โว

จรถ พฺรหฺมจริยํ อิจฺจาห มุนิ สตฺตโม ฯ

สห วาจาย สพฺเพปิ ภิกฺขุเวสธรา มยํ

อหุมฺห อุปสมฺปนฺนา โสตาปนฺนาว สาสเน ฯ

ตโต เชตวนํ คนฺตฺวา อนุสาสิ วินายโก

อนุสิฏฺโฐ ชิเนนาหํ อรหตฺตํ อปาปุณึ ฯ

ตโต ภิกฺขุสหสฺสานิ อนุสาสิมหํ ตทา

มมานุสาสนกรา เตปิ อาสุํ อนาสวา ฯ

ชิโน ตสฺมึ คุเณ ตุฏฺโฐ เอตทคฺเค ฐเปสิ มํ

ภิกฺขุโอวาทกานคฺโค กปฺปิโนติ มหาชเน ๖ ฯ

สตสหสฺเส กตํ กมฺมํ ผลํ ทสฺเสสิ เม อิธ

สุมุตฺโต สรเวโคว กิเลเส ฌาปยึ มม ฯ #๑ โป. สสํว ฯ ยุ. สสีว ฯ ๒ ม. เทสนา ชลทนฺตรํ ฯ ยุ. เทสนา ชลนนฺทนํ ฯ #๓ ม. ยุ. ตโต โน อาสยํ ฯ ๔ ม. นิพฺพินฺทามฺห ฯ ยุ. นิพฺพิณฺณามฺห ฯ ๕ ม. ยุ. #ทุกฺขนฺตกรณาย โว ฯ ๖ ยุ. มหาชิโน ฯ