กตมนฺตํ รูปํ พาหิรํ รูปสฺส สนฺตติ โย รูปสฺส อุปจโย สา รูปสฺส สนฺตติ อิทนฺตํ รูปํ พาหิรํ รูปสฺส สนฺตติ ฯ กตมนฺตํ รูปํ พาหิรํ รูปสฺส นสนฺตติ รูปายตนํ ฯเปฯ กพฬึกาโร อาหาโร อิทนฺตํ รูปํ พาหิรํ รูปสฺส นสนฺตติ ฯ
[๖๓๑] กตมนฺตํ รูปํ อชฺฌตฺติกํ รูปสฺส นชรตา จกฺขายตนํ ฯเปฯ กายายตนํ อิทนฺตํ รูปํ รูปสฺส นชรตา ฯ กตมนฺตํ รูปํ พาหิรํ รูปสฺส ชรตา ยา รูปสฺส ชรา ชีรณตา ขณฺฑิจฺจํ ปาลิจฺจํ วลิตฺตจตา อายุโน สํหานิ อินฺทฺริยานํ ปริปาโก อิทนฺตํ รูปํ พาหิรํ รูปสฺส ชรตา ฯ กตมนฺตํ รูปํ พาหิรํ รูปสฺส นชรตา รูปายตนํ ฯเปฯ กพฬึกาโร อาหาโร อิทนฺตํ รูปํ พาหิรํ รูปสฺส นชรตา ฯ
[๖๓๒] กตมนฺตํ รูปํ อชฺฌตฺติกํ รูปสฺส นอนิจฺจตา จกฺขายตนํ ฯเปฯ กายายตนํ อิทนฺตํ รูปํ อชฺฌตฺติกํ รูปสฺส นอนิจฺจตา ฯ กตมนฺตํ รูปํ พาหิรํ รูปสฺส อนิจฺจตา โย รูปสฺส ขโย วโย เภโท ปริเภโท อนิจฺจตา อนฺตรธานํ อิทนฺตํ รูปํ พาหิรํ รูปสฺส อนิจฺจตา ฯ กตมนฺตํ รูปํ พาหิรํ รูปสฺส นอนิจฺจตา รูปายตนํ ฯเปฯ กพฬึกาโร อาหาโร อิทนฺตํ รูปํ พาหิรํ รูปสฺส นอนิจฺจตา ฯ
[๖๓๓] กตมนฺตํ รูปํ อชฺฌตฺติกํ น กพฬึกาโร อาหาโร จกฺขายตนํ ฯเปฯ กายายตนํ อิทนฺตํ รูปํ อชฺฌตฺติกํ น กพฬึกาโร อาหาโร ฯ