ปฏิจฺจวาโร

[๑๖๓๓] กิเลสวิปฺปยุตฺตํ สงฺกิเลสิกํ อพฺยากตํ ธมฺมํ ปฏิจฺจ กิเลส- วิปฺปยุตฺโต สงฺกิเลสิโก อพฺยากโต ธมฺโม อุปฺปชฺชติ เหตุปจฺจยา: ฯ กิเลสวิปฺปยุตฺตํ อสงฺกิเลสิกํ อพฺยากตํ ธมฺมํ ปฏิจฺจ กิเลสวิปฺปยุตฺโต อสงฺกิเลสิโก อพฺยากโต ธมฺโม อุปฺปชฺชติ เหตุปจฺจยา: ตีณิ ฯ กิเลสวิปฺปยุตฺตํ สงฺกิเลสิกํ อพฺยากตญฺจ กิเลสวิปฺปยุตฺตํ อสงฺกิเลสิกํ อพฺยากตญฺจ ธมฺมํ ปฏิจฺจ กิเลสวิปฺปยุตฺโต สงฺกิเลสิโก อพฺยากโต ธมฺโม อุปฺปชฺชติ เหตุปจฺจยา: ฯ

[๑๖๓๔] เหตุยา ปญฺจ อารมฺมเณ เทฺว อวิคเต ปญฺจ ฯ

โลกิยโลกุตฺตรทุกอพฺยากตสทิสํ ฯ

สหชาตวาเรปิ ปญฺหาวาเรปิ สพฺพตฺถ วิตฺถาเรตพฺพํ ฯ

กิเลสวิปฺปยุตฺตสงฺกิเลสิกทุกกุสลตฺติกํ นิฏฺฐิตํ ฯ

กิเลสโคจฺฉกทุกกุสลตฺติกํ นิฏฺฐิตํ ฯ

_________

ทสฺสเนนปหาตพฺพทุกกุสลตฺติกํ

[๑๖๓๕] นทสฺสเนนปหาตพฺพํ กุสลํ ธมฺมํ ปฏิจฺจ นทสฺสเนนปหาตพฺโพ กุสโล ธมฺโม อุปฺปชฺชติ เหตุปจฺจยา: ฯ

[๑๖๓๖] เหตุยา เอกํ อารมฺมเณ เอกํ อธิปติยา เอกํ อวิคเต เอกํ ฯ

สหชาตวาเรปิ ปญฺหาวาเรปิ สพฺพตฺถ เอกํ ฯ