Kilesavippayuttaṁ saṅkilesikaṁ abyākataṁ dhammaṁ paṭicca kilesavippayutto saṅkilesiko abyākato dhammo uppajjati hetupaccayā. Kilesavippayuttaṁ asaṅkilesikaṁ abyākataṁ dhammaṁ paṭicca kilesavippayutto asaṅkilesiko abyākato dhammo uppajjati hetupaccayā … tīṇi. Kilesavippayuttaṁ saṅkilesikaṁ abyākatañca kilesavippayuttaṁ asaṅkilesikaṁ abyākatañca dhammaṁ paṭicca kilesavippayutto saṅkilesiko abyākato dhammo uppajjati hetupaccayā. (Saṅkhittaṁ.) Hetuyā pañca, ārammaṇe dve …pe… āsevane ekaṁ …pe… avigate pañca. (Saṅkhittaṁ. Lokiyadukaabyākatasadisaṁ. Sahajātavārepi …pe… pañhāvārepi sabbattha vitthāretabbaṁ.) Kilesagocchakakusalattikaṁ niṭṭhitaṁ. 3.13. Piṭṭhiduka, Kusalattika 3.13.1.1–7. Paṭiccādivāra Paccayacatukka Nadassanena pahātabbaṁ kusalaṁ dhammaṁ paṭicca nadassanena pahātabbo kusalo dhammo uppajjati hetupaccayā. (Saṅkhittaṁ.) Hetuyā ekaṁ, ārammaṇe ekaṁ, adhipatiyā ekaṁ …pe… avigate ekaṁ. (Saṅkhittaṁ. Sahajātavārepi …pe… pañhāvārepi sabbattha ekaṁ.)