สมุฏฺฐานสีสสงฺเขปํ ๑

[๘๒๖] อนิจฺจา สพฺพสงฺขารา ๒ ทุกฺขานตฺตา จ สงฺขตา ฯ

นิพฺพานญฺเจว ปณฺณตฺติ อนตฺตา อิติ นิจฺฉยา ฯ

พุทฺธจนฺเท อนุปฺปนฺเน พุทฺธาทิจฺเจ อนุคฺคเต

เตสํ สภาคธมฺมานํ นามมตฺตํ น ญายติ ๓ ฯ

ทุกฺกรํ วิวิธํ กตฺวา ปูรยิตฺวาน ปารมี ๔

อุปฺปชฺชนฺติ มหาวีรา จกฺขุภูตา สพฺรหฺมเก

เต เทสยนฺติ สทฺธมฺมํ ทุกฺขหานึ สุขาวหํ ฯ

องฺคีรโส สกฺยมุนิ สพฺพภูตานุกมฺปโก

สพฺพสตฺตุตฺตโม สีโห ปิฏเก ตีณิ เทสยิ

สุตฺตนฺตํ อภิธมฺมญฺจ วินยญฺจ มหาคุณํ ฯ

เอวํ นียติ สทฺธมฺโม วินโย ยทิ ติฏฺฐติ

อุภโต จ วิภงฺคานิ ขนฺธกา ยา จ มาติกา

มาลา สุตฺตคุเณเนว ปริวาเรน คนฺถิตา ฯ

ตสฺเสว ปริวารสฺส สมุฏฺฐานํ นิยโต กตํ

สมฺเภทนิทานญฺจญฺญํ สุตฺเต ทิสฺสนฺติ อุปริ

ตสฺมา สิกฺเข ปริวารํ ธมฺมกาโม สุเปสโลติ ฯ

วิภงฺเค ทฺวีสุ ปญฺญตฺตํ อุทฺทิสนฺติ อุโปสเถ

ปวกฺขามิ สมุฏฺฐานํ ยถาญายํ สุณาถ เม ฯ #๑ ยุ. สมุฏฺฐานสฺสุทฺทานํ ฯ ม. สมุฏฺฐานสีสสงฺเขปสมุฏฺฐานสฺสุทฺทานํ ฯ ๒ ม. ยุ. #สพฺเพ ฯ ๓ ม. ยุ. นายติ ฯ ๔ ยุ. ปารมิ ฯ