ປາຍາສິລາຊັນຍະສູດ: ໃຫ້ດ້ວຍຄວາມເຄົາລົບ ດ້ວຍມືຕົນເອງ ແລະ ບໍ່ໃຫ້ຄືຖິ້ມ

ຕອນຈົບຂອງປາຍາສິລາຊັນຍະສູດ ທີຄະນິກາຍ ມະຫາວັກ ຫຼັງເຈົ້າປາຍາສິຍອມຮັບພະລັດຕະນະໄຕເປັນສະລະນະແລ້ວ ໄດ້ຂໍໃຫ້ພະກຸມາລະກັດສະປະແນະນຳວິທີບູຊາມະຫາຍັນ ພະກຸມາລະກັດສະປະປຽບວ່າ ຍັນທີ່ຕ້ອງຂ້າສັດແລະຜູ້ຮັບເປັນຜູ້ເຫັນຜິດ ຄືກັບຫວ່ານເມັດພັນເສຍລົງໃນນາທີ່ບໍ່ດີ ສ່ວນຍັນທີ່ບໍ່ຂ້າສັດແລະຜູ້ຮັບປະພຶດຊອບ ຄືກັບຫວ່ານເມັດດີໃນນາດີທີ່ຝົນຕົກຕ້ອງຕາມລະດູ

ເຈົ້າປາຍາສິຈຶ່ງຕັ້ງໂຮງທານແກ່ສະມະນະພາມ ຄົນກຳພ້າ ຄົນເດີນທາງ ວະນິບົກ ແລະ ຍາຈົກ ແຕ່ໃຫ້ເຂົ້າຫັກກັບນ້ຳຜັກດອງ ແລະ ຜ້າເນື້ອຫຍາບ ອຸດຕະລະມານົບຜູ້ເບິ່ງແຍງທານອຸທິດວ່າ ຂໍໃຫ້ພົບເຈົ້າປາຍາສິໃນໂລກນີ້ເທົ່ານັ້ນ ຢ່າໄດ້ພົບໃນໂລກໜ້າ ເມື່ອຖືກເອີ້ນໄປຖາມ ເຂົາອະທິບາຍເຫດຜົນຕົງໆ ເຈົ້າປາຍາສິຈຶ່ງໃຫ້ປ່ຽນເປັນອາຫານແລະຜ້າແບບທີ່ຕົນໃຊ້ເອງ

ພະສູດເລົ່າວ່າ ເຈົ້າປາຍາສິໃຫ້ທານໂດຍບໍ່ເຄົາລົບ ບໍ່ໃຫ້ດ້ວຍມືຕົນ ບໍ່ໃສ່ໃຈ ແລະ ໃຫ້ຢ່າງຖິ້ມ ຕາຍແລ້ວໄປເກີດເປັນເທບຊັ້ນຈາຕຸມະຫາລາດໃນວິມານເສລີສະກະອັນວ່າງເປົ່າ ສ່ວນອຸດຕະລະມານົບຜູ້ໃຫ້ດ້ວຍຄວາມເຄົາລົບໄປເກີດໃນຊັ້ນດາວະດຶງ ເມື່ອພະຄະວັມປະຕິໄປພັກກາງເວັນທີ່ວິມານນັ້ນ ປາຍາສິເທບບຸດຈຶ່ງຝາກທ່ານກັບມາບອກມະນຸດ