ສຸນັກຂັດຕະສູດ: ບາດແຜທີ່ຍັງບໍ່ປະສານ

ໃນສຸນັກຂັດຕະສູດ ມັດຊິມະນິກາຍ ພະສຸນັກຂັດຕະ ລິດສະວີບຸດ ທູນຖາມພະພຸດທະເຈົ້າວ່າ ພິກຂຸຈຳນວນຫຼາຍທີ່ພະຍາກອນອໍລະຫັດຕະຜົນນັ້ນ ພະຍາກອນໂດຍຊອບແທ້ຫຼືບໍ່ ຫຼື ບາງພວກພະຍາກອນດ້ວຍຄວາມສຳຄັນຜິດວ່າຕົນໄດ້ບັນລຸ ພະພຸດທະເຈົ້າຕັດວ່າມີທັງສອງຢ່າງ

ຈາກນັ້ນຊົງສະແດງວ່າຄົນເຮົານ້ອມໃຈໄປຄົນລະທາງ ຜູ້ນ້ອມໃຈໄປໃນໂລກາມິດກໍຖະໜັດແຕ່ເລື່ອງໂລກາມິດ ຜູ້ນ້ອມໃຈໄປໃນສະມາບັດຂັ້ນຕ່າງໆ ກໍສົນໃຈແຕ່ເລື່ອງນັ້ນ ຊົງໃຊ້ອຸປະມາຫຼາຍຢ່າງ ເຊັ່ນ ໃບໄມ້ເຫຼືອງທີ່ຫຼຸດຈາກຂົ້ວແລ້ວບໍ່ອາດກັບຂຽວສົດ ຫີນທີ່ແຕກເປັນສອງຊີກແລ້ວເຊື່ອມໃຫ້ສະໜິດບໍ່ໄດ້ ຄົນທີ່ອິ່ມແລ້ວຖິ້ມອາຫານໄປຍ່ອມບໍ່ປາຖະໜາອາຫານນັ້ນອີກ ແລະ ຕົ້ນຕານຍອດດ້ວນທີ່ບໍ່ອາດງອກງາມໄດ້ອີກ

ແລ້ວຊົງສະແດງອຸປະມາສຳຄັນ ຄືຄົນຖືກລູກທະນູຊຸບຢາພິດ ໝໍຜ່າຕັດຖອນລູກທະນູ ແລະ ກຳຈັດພິດຈົນໝົດເຊື້ອ ແລ້ວສັ່ງວິທີເບິ່ງແຍງບາດແຜ ຄົນທີ່ຄິດວ່າຕົນໝົດອັນຕະລາຍແລ້ວຈຶ່ງບໍ່ເຮັດຕາມ ບາດແຜກໍກຳເລີບຈົນເຖິງຕາຍ ຫຼື ທຸກປານຕາຍ ສ່ວນຄົນທີ່ເຮັດຕາມຄຳໝໍ ບາດແຜກໍຫາຍສະໜິດ ທ້າຍພະສູດຊົງໄຂອຸປະມາວ່າ ບາດແຜຄືອາຍະຕະນະພາຍໃນ 6 ພິດຄືອະວິຊາ ລູກທະນູຄືຕັນຫາ ເຄື່ອງກວດຄືສະຕິ ອາວຸດຄືປັນຍາຂອງພະອະລິຍະ ແລະ ໝໍຜ່າຕັດຄືຕະຖາຄົດ