สังยุตตนิกาย มหาวารวรรค
บาลีโรมัน (มหาสังคีติ) · เล่ม ๑๙ · หน้า ๒๘๘
เข้าสู่ระบบเพื่อคั่นหน้า

Idamavoca bhagavā. Idaṁ vatvā ca sugato athāparaṁ etadavoca satthā: “Dhī taṁ jammi jare atthu, dubbaṇṇakaraṇī jare; Tāva manoramaṁ bimbaṁ, jarāya abhimadditaṁ. Yopi vassasataṁ jīve, sopi maccuparāyaṇo; Na kiñci parivajjeti, sabbamevābhimaddatī”ti. Paṭhamaṁ.

5. Jarāvagga

Uṇṇābhabrāhmaṇasutta Sāvatthinidānaṁ. Atha kho uṇṇābho brāhmaṇo yena bhagavā tenupasaṅkami; upasaṅkamitvā bhagavatā saddhiṁ sammodi. Sammodanīyaṁ kathaṁ sāraṇīyaṁ vītisāretvā ekamantaṁ nisīdi. Ekamantaṁ nisinno kho uṇṇābho brāhmaṇo bhagavantaṁ etadavoca: “Pañcimāni, bho gotama, indriyāni nānāvisayāni nānāgocarāni, na aññamaññassa gocaravisayaṁ paccanubhonti. Katamāni pañca? Cakkhundriyaṁ, sotindriyaṁ, ghānindriyaṁ, jivhindriyaṁ, kāyindriyaṁ. Imesaṁ nu kho, bho gotama, pañcannaṁ indriyānaṁ nānāvisayānaṁ nānāgocarānaṁ na aññamaññassa gocaravisayaṁ paccanubhontānaṁ kiṁ paṭisaraṇaṁ, ko ca nesaṁ gocaravisayaṁ paccanubhotī”ti?

หัวข้อ (สรุปโดย AI) ชราสูตร
เข้าสู่ระบบเพื่อบันทึกความคืบหน้า
เข้าสู่ระบบเพื่อรับ ๒๐ แต้มบุญจากการอ่านหน้านี้