Katamaṁ taṁ rūpaṁ kāyaviññatti? Yā kusalacittassa vā akusalacittassa vā abyākatacittassa vā abhikkamantassa vā paṭikkamantassa vā ālokentassa vā vilokentassa vā samiñjentassa vā pasārentassa vā kāyassa thambhanā santhambhanā santhambhitattaṁ viññatti viññāpanā viññāpitattaṁ— idaṁ taṁ rūpaṁ kāyaviññatti. Katamaṁ taṁ rūpaṁ na kāyaviññatti? Cakkhāyatanaṁ …pe… kabaḷīkāro āhāro— idaṁ taṁ rūpaṁ na kāyaviññatti. Katamaṁ taṁ rūpaṁ vacīviññatti? Yā kusalacittassa vā akusalacittassa vā abyākatacittassa vā vācā girā byappatho udīraṇaṁ ghoso ghosakammaṁ vācā vacībhedo, ayaṁ vuccati vācā. Yā tāya vācāya viññatti viññāpanā viññāpitattaṁ— idaṁ taṁ rūpaṁ vacīviññatti. Katamaṁ taṁ rūpaṁ na vacīviññatti? Cakkhāyatanaṁ …pe… kabaḷīkāro āhāro— idaṁ taṁ rūpaṁ na vacīviññatti. Katamaṁ taṁ rūpaṁ ākāsadhātu? Yo ākāso ākāsagataṁ aghaṁ aghagataṁ vivaro vivaragataṁ asamphuṭṭhaṁ catūhi mahābhūtehi— idaṁ taṁ rūpaṁ ākāsadhātu. Katamaṁ taṁ rūpaṁ na ākāsadhātu? Cakkhāyatanaṁ …pe… kabaḷīkāro āhāro— idaṁ taṁ rūpaṁ na ākāsadhātu. Katamaṁ taṁ rūpaṁ āpodhātu? Yaṁ āpo āpogataṁ sineho sinehagataṁ bandhanattaṁ rūpassa— idaṁ taṁ rūpaṁ āpodhātu. Katamaṁ taṁ rūpaṁ na āpodhātu? Cakkhāyatanaṁ …pe… kabaḷīkāro āhāro— idaṁ taṁ rūpaṁ na āpodhātu.