Katamaṁ taṁ rūpaṁ ajjhattikaṁ na kabaḷīkāro āhāro? Cakkhāyatanaṁ …pe… kāyāyatanaṁ— idaṁ taṁ rūpaṁ ajjhattikaṁ na kabaḷīkāro āhāro. Katamaṁ taṁ rūpaṁ bāhiraṁ kabaḷīkāro āhāro? Odano kummāso sattu maccho maṁsaṁ khīraṁ dadhi sappi navanītaṁ telaṁ madhu phāṇitaṁ, yaṁ vā panaññampi atthi rūpaṁ yamhi yamhi janapade tesaṁ tesaṁ sattānaṁ mukhāsiyaṁ dantavikhādanaṁ galajjhoharaṇīyaṁ kucchivitthambhanaṁ yāya ojāya sattā yāpenti— idaṁ taṁ rūpaṁ bāhiraṁ kabaḷīkāro āhāro. Katamaṁ taṁ rūpaṁ bāhiraṁ na kabaḷīkāro āhāro? Rūpāyatanaṁ …pe… rūpassa aniccatā— idaṁ taṁ rūpaṁ bāhiraṁ na kabaḷīkāro āhāro. Evaṁ tividhena rūpasaṅgaho. Sukhumarūpatikaṁ. Tikaniddeso. 2.2.3.4. Catukka Katamaṁ taṁ rūpaṁ upādā upādinnaṁ? Cakkhāyatanaṁ …pe… kāyāyatanaṁ, itthindriyaṁ purisindriyaṁ jīvitindriyaṁ, yaṁ vā panaññampi atthi rūpaṁ kammassa katattā rūpāyatanaṁ gandhāyatanaṁ rasāyatanaṁ ākāsadhātu rūpassa upacayo rūpassa santati kabaḷīkāro āhāro— idaṁ taṁ rūpaṁ upādā upādinnaṁ. Katamaṁ taṁ rūpaṁ upādā anupādinnaṁ? Saddāyatanaṁ kāyaviññatti vacīviññatti rūpassa lahutā rūpassa mudutā rūpassa kammaññatā rūpassa jaratā rūpassa aniccatā, yaṁ vā panaññampi atthi rūpaṁ na kammassa katattā rūpāyatanaṁ gandhāyatanaṁ rasāyatanaṁ ākāsadhātu rūpassa upacayo rūpassa santati kabaḷīkāro āhāro— idaṁ taṁ rūpaṁ upādā anupādinnaṁ.