Katamaṁ taṁ rūpaṁ rūpassa jaratā? Yā rūpassa jarā jīraṇatā khaṇḍiccaṁ pāliccaṁ valittacatā āyuno saṁhāni indriyānaṁ paripāko— idaṁ taṁ rūpaṁ rūpassa jaratā. Katamaṁ taṁ rūpaṁ rūpassa na jaratā? Cakkhāyatanaṁ …pe… kabaḷīkāro āhāro— idaṁ taṁ rūpaṁ rūpassa na jaratā. Katamaṁ taṁ rūpaṁ rūpassa aniccatā? Yo rūpassa khayo vayo bhedo paribhedo aniccatā antaradhānaṁ— idaṁ taṁ rūpaṁ rūpassa aniccatā. Katamaṁ taṁ rūpaṁ rūpassa na aniccatā? Cakkhāyatanaṁ …pe… kabaḷīkāro āhāro— idaṁ taṁ rūpaṁ rūpassa na aniccatā. Katamaṁ taṁ rūpaṁ kabaḷīkāro āhāro? Odano kummāso sattu maccho maṁsaṁ khīraṁ dadhi sappi navanītaṁ telaṁ madhu phāṇitaṁ, yaṁ vā panaññampi atthi rūpaṁ yamhi yamhi janapade tesaṁ tesaṁ sattānaṁ mukhāsiyaṁ dantavikhādanaṁ galajjhoharaṇīyaṁ kucchivitthambhanaṁ, yāya ojāya sattā yāpenti— idaṁ taṁ rūpaṁ kabaḷīkāro āhāro. Katamaṁ taṁ rūpaṁ na kabaḷīkāro āhāro? Cakkhāyatanaṁ …pe… rūpassa aniccatā— idaṁ taṁ rūpaṁ na kabaḷīkāro āhāro. Evaṁ duvidhena rūpasaṅgaho. Sukhumarūpadukaṁ. Dukaniddeso. 2.2.3.3. Tikaniddesa Katamaṁ taṁ rūpaṁ ajjhattikaṁ upādā? Cakkhāyatanaṁ …pe… kāyāyatanaṁ— idaṁ taṁ rūpaṁ ajjhattikaṁ upādā. Katamaṁ taṁ rūpaṁ bāhiraṁ upādā? Rūpāyatanaṁ …pe… kabaḷīkāro āhāro— idaṁ taṁ rūpaṁ bāhiraṁ upādā.