Kittāvatā dhātūnaṁ dhātupaññatti? Yāvatā aṭṭhārasa dhātuyo— cakkhudhātu, rūpadhātu, cakkhuviññāṇadhātu, sotadhātu, saddadhātu, sotaviññāṇadhātu, ghānadhātu, gandhadhātu, ghānaviññāṇadhātu, jivhādhātu, rasadhātu, jivhāviññāṇadhātu, kāyadhātu, phoṭṭhabbadhātu, kāyaviññāṇadhātu, manodhātu, dhammadhātu, manoviññāṇadhātu; ettāvatā dhātūnaṁ dhātupaññatti. Kittāvatā saccānaṁ saccapaññatti? Yāvatā cattāri saccāni— dukkhasaccaṁ, samudayasaccaṁ, nirodhasaccaṁ, maggasaccaṁ; ettāvatā saccānaṁ saccapaññatti. Kittāvatā indriyānaṁ indriyapaññatti? Yāvatā bāvīsatindriyāni— cakkhundriyaṁ, sotindriyaṁ, ghānindriyaṁ, jivhindriyaṁ, kāyindriyaṁ, manindriyaṁ, itthindriyaṁ, purisindriyaṁ, jīvitindriyaṁ, sukhindriyaṁ, dukkhindriyaṁ, somanassindriyaṁ, domanassindriyaṁ, upekkhindriyaṁ, saddhindriyaṁ, vīriyindriyaṁ, satindriyaṁ, samādhindriyaṁ, paññindriyaṁ, anaññātaññassāmītindriyaṁ, aññindriyaṁ, aññātāvindriyaṁ; ettāvatā indriyānaṁ indriyapaññatti.