Rūpakkhandho ca vedanākkhandho ca saññākkhandho ca saṅkhārakkhandho ca viññāṇakkhandho ca katihi khandhehi katihāyatanehi katihi dhātūhi saṅgahitā? Rūpakkhandho ca vedanākkhandho ca saññākkhandho ca saṅkhārakkhandho ca viññāṇakkhandho ca pañcahi khandhehi dvādasāyatanehi aṭṭhārasahi dhātūhi saṅgahitā. Katihi asaṅgahitā? Na kehici khandhehi na kehici āyatanehi na kāhici dhātūhi asaṅgahitā. Pañcakkhandhā katihi khandhehi katihāyatanehi katihi dhātūhi saṅgahitā? Pañcakkhandhā pañcahi khandhehi dvādasahāyatanehi aṭṭhārasahi dhātūhi saṅgahitā. Katihi asaṅgahitā? Na kehici khandhehi na kehici āyatanehi na kāhici dhātūhi asaṅgahitā. (Pañcakaṁ.) 2.1.2. Āyatana Cakkhāyatanaṁ katihi khandhehi katihāyatanehi katihi dhātūhi saṅgahitaṁ? Cakkhāyatanaṁ ekena khandhena ekenāyatanena ekāya dhātuyā saṅgahitaṁ. Katihi asaṅgahitaṁ? Catūhi khandhehi ekādasahāyatanehi sattarasahi dhātūhi asaṅgahitaṁ. Sotāyatanaṁ … ghānāyatanaṁ … jivhāyatanaṁ … kāyāyatanaṁ … rūpāyatanaṁ … saddāyatanaṁ … gandhāyatanaṁ … rasāyatanaṁ … phoṭṭhabbāyatanaṁ …pe… ekena khandhena ekenāyatanena ekāya dhātuyā saṅgahitaṁ. Katihi asaṅgahitaṁ? Catūhi khandhehi ekādasahāyatanehi sattarasahi dhātūhi asaṅgahitaṁ. Manāyatanaṁ ekena khandhena ekenāyatanena sattahi dhātūhi saṅgahitaṁ. Katihi asaṅgahitaṁ? Catūhi khandhehi ekādasahāyatanehi ekādasahi dhātūhi asaṅgahitaṁ. Dhammāyatanaṁ asaṅkhataṁ khandhato ṭhapetvā catūhi khandhehi ekenāyatanena ekāya dhātuyā saṅgahitaṁ. Katihi asaṅgahitaṁ? Ekena khandhena ekādasahāyatanehi sattarasahi dhātūhi asaṅgahitaṁ. (Ekamūlakaṁ.)