Kathañca puggalo ādheyyamukho hoti? Idhekacco puggalo parassa vaṇṇe vā avaṇṇe vā bhāsiyamāne khippaññeva adhimuccitā hoti. Evaṁ puggalo ādheyyamukho hoti. Kathañca puggalo lolo hoti? Idhekacco puggalo ittarasaddho hoti ittarabhattī ittarapemo ittarappasādo. Evaṁ puggalo lolo hoti. Kathañca puggalo mando momūho hoti? Idhekacco puggalo kusalākusale dhamme na jānāti, sāvajjānavajje dhamme na jānāti, hīnappaṇīte dhamme na jānāti, kaṇhasukkasappaṭibhāge dhamme na jānāti. Evaṁ puggalo mando momūho hoti. Tattha katame pañca yodhājīvūpamā puggalā? Pañca yodhājīvā— idhekacco yodhājīvo rajaggaññeva disvā saṁsīdati visīdati na santhambhati na sakkoti saṅgāmaṁ otarituṁ. Evarūpopi idhekacco yodhājīvo hoti. Ayaṁ paṭhamo yodhājīvo santo saṁvijjamāno lokasmiṁ. Puna caparaṁ idhekacco yodhājīvo sahati rajaggaṁ, api ca kho dhajaggaññeva disvā saṁsīdati visīdati na santhambhati na sakkoti saṅgāmaṁ otarituṁ. Evarūpopi idhekacco yodhājīvo hoti. Ayaṁ dutiyo yodhājīvo santo saṁvijjamāno lokasmiṁ. Puna caparaṁ idhekacco yodhājīvo sahati rajaggaṁ sahati dhajaggaṁ, api ca kho ussāraṇaññeva sutvā saṁsīdati visīdati na santhambhati na sakkoti saṅgāmaṁ otarituṁ. Evarūpopi idhekacco yodhājīvo hoti. Ayaṁ tatiyo yodhājīvo santo saṁvijjamāno lokasmiṁ.