ສຸທາໂພຊະນະຊາດົກ: ເສດຖີຂີ້ຖີ່ຜູ້ຮຽນຮູ້ການແບ່ງປັນ

ໃນສຸທາໂພຊະນະຊາດົກ ອະສີຕິນິບາດ ຊາດົກ ຂຸດທະກະນິກາຍ ຄາຖາເປີດດ້ວຍຄຳຂອງໂກສິຍະເສດຖີວ່າ ຕົນບໍ່ໄດ້ຊື້ບໍ່ໄດ້ຂາຍ ບໍ່ມີຂອງສະສົມ ເຂົ້າກຳມືໜຶ່ງນີ້ມີໜ້ອຍ ແລະ ຫາໄດ້ຍາກ ບໍ່ພໍສຳລັບສອງຄົນ ຜູ້ມາຂໍຕອບວ່າ ຂອງໜ້ອຍກໍຄວນໃຫ້ຕາມໜ້ອຍ ຂອງປານກາງໃຫ້ຕາມປານກາງ ຂອງຫຼາຍໃຫ້ຕາມຫຼາຍ ການບໍ່ໃຫ້ເລີຍບໍ່ສົມຄວນ ຈົ່ງໃຫ້ທານ ແລະ ຈົ່ງບໍລິໂພກ ເພາະຜູ້ກິນຜູ້ດຽວຍ່ອມບໍ່ໄດ້ຄວາມສຸກ ຄຳເຕືອນນີ້ຊ້ຳຫຼາຍຮອບ ຈົນຜູ້ມາຂໍເປີດເຜີຍຕົວວ່າເປັນທ້າວສັກກະ ຈັນທະເທບບຸດ ສຸລິຍະເທບບຸດ ແລະ ມາຕະລີເທບສາລະຖີ ສ່ວນໝາທີ່ມານຳຄືປັນຈະສິຂະເທບບຸດ ທັງໝົດເຄີຍເປັນຍາດຂອງໂກສິຍະໃນຊາດກ່ອນ ມາເພື່ອບໍ່ໃຫ້ລາວໄປນະລົກຍ້ອນຄວາມຂີ້ຖີ່ ໂກສິຍະຮັບຄຳ ແລະ ປະກາດເຊົາຂີ້ຖີ່ຕັ້ງແຕ່ມື້ນັ້ນ

ເຄິ່ງຫຼັງຂອງຄາຖາ ເທບທິດາ 4 ອົງ ຄື ອາສາ ສັດທາ ສິລິ ແລະ ຫິລິ ຜິດຖຽງກັນວ່າໃຜປະເສີດ ທ້າວສັກກະໃຫ້ມາຕະລີນຳສຸທາໂພດໄປໃຫ້ໂກສິຍະ ເຊິ່ງບັດນີ້ເປັນດາບົດຜູ້ບໍ່ໃຫ້ກ່ອນແລ້ວບໍ່ບໍລິໂພກ ຜູ້ທີ່ໂກສິຍະໃຫ້ສຸທາໂພດຈະເປັນຜູ້ປະເສີດ ໂກສິຍະດາບົດບໍ່ໃຫ້ແກ່ເທບທິດາສາມອົງທຳອິດ ແຕ່ເຊີນຫິລິເທວີຜູ້ບໍ່ກ້າເອີ່ຍປາກຂໍເຂົ້າອາສົມ ແລະ ໃຫ້ສຸທາໂພດ ເພາະຫິລິຄືຄວາມລະອາຍຕໍ່ບາບ ເຊິ່ງກັ້ນຄົນໄວ້ຈາກຄວາມຊົ່ວ

ຊາດົກໃນພະໄຕຣປິດົກມີພຽງຄາຖາ ເນື້ອເລື່ອງຂ້າງເທິງມາຈາກຄາຖາ ລວມທັງຄາຖາສຸດທ້າຍທີ່ລະບຸວ່າ ໂກສິຍະດາບົດຄືພິກຂຸຜູ້ຍິນດີໃນທານ ແລະ ທ້າວວາສະວະຄືພະພຸດທະເຈົ້າ ສ່ວນລາຍລະອຽດວ່າ ໂກສິຍະເປັນທາຍາດຂອງຕະກູນທີ່ໃຫ້ທານມາຫຼາຍຊົ່ວຄົນ ແຕ່ກັບມ້າງໂຮງທານຖິ້ມ ຂີ້ຖີ່ເຖິງຂັ້ນລັກຫຸງເຂົ້າປາຍາດກິນຜູ້ດຽວ ຈົນເທບເຫຼົ່ານັ້ນແປງເປັນພາມມາຂໍເທື່ອລະອົງ ມາຈາກອັດຖະກະຖາ