ປິງຄິຍະ: ຮຽນທຳມະເມື່ອແກ່ຊະລາ

ໃນປາລາຍະນະວັກ ສຸດຕະນິບາດ ປິງຄິຍະມານົບເປັນໜຶ່ງໃນລູກສິດສິບຫົກຄົນຂອງພາມພາວະລີ ທີ່ໄປທູນຖາມປັນຫາພະພຸດທະເຈົ້າ ທ່ານທູນວ່າ "ຂ້າພະອົງແກ່ແລ້ວ ບໍ່ມີກຳລັງ ຜິວພັນໝອງຄ້ຳ ຕາບໍ່ແຈ່ມໃສ ຫູໄດ້ຍິນບໍ່ຊັດ ຂໍຢ່າໃຫ້ຂ້າພະອົງຫຼົງຕາຍເສຍໃນລະຫວ່າງ ຂໍໂປດຕັດບອກທຳມະທີ່ຂ້າພະອົງພໍຈະຮູ້ໄດ້ ເປັນເຄື່ອງລະຊາດ ແລະ ຊະລາໃນໂລກນີ້"

ຈູລະນິດເທດຂະຫຍາຍຄວາມວ່າ ໃນຕອນນັ້ນທ່ານມີອາຍຸ 120 ປີ

ພະພຸດທະເຈົ້າຕັດຕອບສອງເທື່ອ ເທື່ອທຳອິດວ່າ ເຫັນຊົນຜູ້ປະມາດເດືອດຮ້ອນເພາະຮູບ ສະນັ້ນຈົ່ງຢ່າປະມາດ ລະຮູບເສຍ ເພື່ອບໍ່ເກີດອີກ ເທື່ອທີສອງວ່າ ເຫັນມະນຸດຖືກຕັນຫາຄອບງຳ ເດືອດຮ້ອນ ຖືກຄວາມແກ່ຖ້ວມທັບ ສະນັ້ນຈົ່ງຢ່າປະມາດ ລະຕັນຫາເສຍ ເພື່ອບໍ່ເກີດອີກ

ໃນບົດສະຫຼຸບປາລາຍະນະວັກ ພະປິງຄິຍະກັບໄປເລົ່າຖວາຍພາມພາວະລີ ແລະ ກ່າວວ່າ ຮ່າງກາຍທີ່ແກ່ຊະລາໄປເຝົ້າພະພຸດທະເຈົ້າບໍ່ໄດ້ ແຕ່ໃຈໄປເຖິງພະອົງສະເໝີ ພະພຸດທະເຈົ້າຕັດວ່າ ພະວັກກະລິ ພະພັດທາວຸທະ ແລະ ພະອາລະວິໂຄຕະມະ ຫຼຸດພົ້ນດ້ວຍສັດທາສັນໃດ ທ່ານກໍຈົ່ງປ່ອຍສັດທາອອກໄປສັນນັ້ນ ທ່ານຈັກໄປເຖິງຝັ່ງແຫ່ງບ່ວງມັດຈຸ